एजेन्सी – आइसिसी टि२० विश्वकप २०२१ को फाइनलमा आज अष्ट्रेलिया र न्युजिल्यान्डबीच प्रतिस्पर्धा हुँदैछ । खेल नेपाली समय अनुसार दुबई इन्टरनेशनल क्रिकेट स्टेडियममा बेलुका ७ : ४५ मा सुरुहुनेछ । अष्ट्रेलिया र न्युजिल्यान्ड दुबै पहिलो पटक टि२० विश्वकप उपाधि जित्ने सोचमा छन् ।

सेमिफाइनलमा दुबै टोलीले बलिया तथा उपाधिका दाबेदार प्रतिद्धन्द्धीलाई स्तब्ध पार्दै फाइनलमा स्थान बनाएका हुन् । पहिलो सेमिफाइनल खेलमा न्युजिल्यान्डले इंग्ल्यान्डलाई ५ विकेटले हराउँदै पहिलो पटक फाइनलमा स्थान बनाएको थियो । दोस्रो सेमिफाइनल खेलमा अष्ट्रेलियाले पाकिस्तानलाई ५ विकेटले हराउँदै दोस्रो पटक फाइनलमा पुगेको हो । न्युजिल्यान्ड पहिलो विश्वकप उपाधि जित्ने सोचमा छ । ओडिआईमा पाँच विश्वकप जितेको अष्ट्रेलिया टि२० विश्वकपमा पहिलो उपाधि हात पार्न चाहन्छ ।

अष्ट्रेलिया दोस्रो पटक टि२० विश्वकप फाइनल खेल्दैछ । सन् २०१० को टि२० विश्वकप फाइनलमा अष्ट्रेलिया इंग्ल्यान्डसँग ८ विकेटले पराजित भएको थियो । न्युजिल्यान्ड पहिलो फाइनलमै च्याम्पियन बन्ने सोचमा छ । न्युजिल्यान्ड सुपर १२ को समूह २ मा ५ खेलमा ४ मा जित र १ मा हार सहित ८ अंकका साथ दोस्रो स्थानमा रहेर सेमिफाइनल खेलेको थियो । अष्ट्रेलिया ५ खेलमा ४ मा जित र १ मा हार सहित ८ अंकका साथ दोस्रो स्थानमा रहँदै सेमिफाइनल खेलेको थियो ।

अष्ट्रेलिया इंग्ल्यान्डसँग ८ विकेटले पराजित भएको थियो । न्युजिल्यान्ड पाकिस्तानसँग ५ विकेटले पराजित भएको थियो । न्युजिल्यान्डले सेमिफाइनलमा स्थान बनाउन भारत र अफगानिस्तान दुबैलाई समान ८ विकेटले हराएको थियो । अष्ट्रेलियाले दक्षिण अफ्रिकालाई ५ विकेट र वेस्टइन्डिजलाई ८ विकेटले हराएको थियो ।अष्ट्रेलियामा च्याम्पियन टोलीको ट्याग छ । २०१५ को एकदिवसिय विश्वकप फाइनलमा न्युजिल्यान्डलाई ७ विकेटले हराउँदै अष्ट्रेलया पाँचौं पटक च्याम्पियन बनेको थियो ।

न्युजिल्यान्ड त्यसको बदला लिन चाहन्छ । केन विलियम्सनको उत्कृष्ट कप्तानीमा न्युजिल्यान्डले उत्कृष्ट प्रदर्शन गर्दै आएको छ । उत्कृष्ट कप्तानी, सन्तुलित टोली, टिम एकता, आक्रामण बलिङ र अनुशासन प्रदर्शन न्युजिल्यान्डको खुबी हो । उत्कृष्ट तीव्र गतिको बलिङ आक्रामण र ब्याटिङ अष्ट्रेलियाको हतियार मानिन्छ ।

न्युजिल्यान्डका ओपनर मार्टिन गुप्टिल र डर्याल मिचेल दुबै राम्रो लयमा छन् । इंग्ल्यान्डलाई स्तब्ध पार्न मिचेलले फाइनलमा ७२ रनको अविजित इनिङ खेलेका थिए । समूह चरणमा भारतलाई हराउन ४९ रन जोडेका थिए । केन विलियम्सन न्युजिल्यान्डका प्रमुख ब्याटर हुन् । उनको प्रदर्शन टोलीको लागि निकै महत्वपूर्ण हुनेछ । डेभन कन्वे चोटका कारण फाइनल खेल्ने छैनन् । त्यसैले उनको स्थानमा विकेटकिपर टिम सिफर्ट खेल्नेछन् ।

मध्यक्रमका ब्याटर ग्लेन फिलिप्सलाई आफ्नो शैलीको खेल खेल्न आवश्यक देखिन्छ । उनी आफ्नो शैलीको खेल खेल्न सकेको खण्डमा टोलीलाई सहजै उपाधि दिलाउन सक्छन् । इंग्ल्यान्डविरुद्ध फाइनलमा नायक बनेका जिमी निशम अष्ट्रेलियालाई पनि घातक बन्न सक्छन् । निशमले अन्त्यतिर ३ छक्का प्रहार गर्दै फाइनलमा स्थान पक्का गराएका थिए । निशम फिनिसरमा माहिर छन् । तीव्र गतिका बलर ट्रेन्ट बोल्ट, टिम साउथी र एडम मिल्ने बलिङ हतियार हुन् । स्पिनर ईश सोधी र मिचेल सान्टनार स्पिनर हतियार हुन् । न्युजिल्यान्डमा एक मात्र परिवर्तनको सम्भावना छ । कन्वेको स्थानमा सिफर्ट खेल्नेछन् ।

अष्ट्रेलिया प्रमुख ओपनर डेविड वार्नर लयमा फर्किएका छन् । जुन टोलीको सकरात्मक पक्ष हो । अपराजित पाकिस्तानलाई सेमिफाइनलमा हराउन वार्नरले आक्रामक ४९ रन जोडेका थिए । त्यसअघि समूह चरणमा वेस्टइन्डिजविरुद्ध ८९ रनमा अविजित थिए । उनले आक्रामक सुरुवात दिलाउदा मध्यक्रम र तल्लोक्रमका ब्याटरलाई खेल्न सहज हुनेछ । कप्तान आरोन फिन्चले भने अपेक्षा अनुसार प्रदर्शन गर्न सकेका छैनन् । मिचेल मार्श राम्रो लयमा छन् । पाकिस्तानलाई हराउन राम्रो सुरुवात दिएका थिए ।

ग्लेन म्याक्सवेलको कमजोर प्रदर्शनले भने अष्ट्रेलिया केहि चिन्तामा छ । म्याक्सवेलले आफ्नो शैलीको खेल खेल्न सकि रहेका छैनन् । उनीबाट आक्रामक ब्याटिङ चाहन्छ । पाकिस्तानविरुद्ध सुपर हिरो बनेका मार्कस स्टोइनिस र म्याथ्यु वेडको ब्याटिङले अष्ट्रेलियाको मनोबल उच्च छ । पाकिस्तानलाई हराउन स्टोइनिस ४० र वेड ४१ रनमा अविजित थिए । छैटौं विकेटका लागि ८१ रनको साझेदारी गरेपछि अष्ट्रेलिया फाइनलमा स्थान बनाएको थियो ।

तीव्र गतिका बलर प्याट कमिन्सबाट पनि तल्लोक्रममा ब्याटिङको आशा गर्न सकिन्छ । कमिन्स, जोश हेजलवुड र मिचेल स्टार्क तीव्र गतिका बलिङ आक्रामण हुन् । हेजलवुड न्युजिल्यान्डलाई घातक बन्न सक्छन् । स्पिनर एडम जाम्पा न्युजिल्यान्डका ब्याटरलाई घातक बन्न सक्छन् । यस विश्वकपमा जाम्पाको प्रदर्शन उत्कृष्ट छ । अष्ट्रेलियामा कुनै परिवर्तनको सम्भावना देखिदैन

हेड टु हेड :

टि२० विश्वकपमा न्युजिल्यान्ड र अष्ट्रेलियाबीच एक मात्र खेल भएको छ । २०१६ मा न्युजिल्यान्ड ८ रनले विजयी भएको थियो । टि२० आईमा कुल १४ खेल भएका छन् । जसमा अष्ट्रेलिया ९ र न्युजिल्यान्ड ५ खेलमा विजयी भएका छन् । गत मार्चमा भएको पाँच टि२० आई सिरिज न्युजिल्यान्डले ३–२ ले जितेको थियो । आइसिसीका खेलमा यी दुई टोलीबीच नकआउट खेलमा कुल १७ खेल भएका छन् । जसमा अष्ट्रेलिया १६ खेलमा विजयी भएको छ ।

फाइनल अघि दुबै कप्तानको भनाई

‘हामी दुबै टोलीलाई धेरै फाइदाहरु छैनन् । फाइनलमा हाम्रो छिमेकीलाई अर्को छेउबाट खेल्नु राम्रो छ । फाइनल साँच्चै रोमान्चक हुनेछ, केन विलियम्सन’, न्युजिल्यान्ड कप्तान ।

‘सबैले हामीलाई विश्वकप फाइनल खेल्छौं भनेर पत्ताएका थिएनन् । तर हामी फाइनल खेल्छौं भन्नेमा आत्माविश्वासी थियौ । हामीले राम्रो तयारी गरेका थियौं । प्रतियोगिता जित्न हाम्रो स्पष्ट योजना छ । विश्वकप जित्ने टोली पाएको महसुस पनि गरेका छौं, आरोन फिन्च”, अष्ट्रेलिया कप्तान ।

प्रत्यक्ष प्रसारण : नेपालमा विश्वकपको प्रत्यक्ष प्रसारण स्टार स्पोर्ट्सका च्यानलबाट हुनेछ ।

टस निर्णायक बन्न सक्छ

दुबईमा पहिला ब्याटिङ गर्ने टोलीले हार्ने सम्भावना उच्च हुन्छ । सेमिफाइनलमा पाकिस्तान र इंग्ल्यान्ड दुबै पहिला ब्याटिङ गर्दा हार्न पुगेका थिए । भारतले पनि पाकिस्तान र न्युजिल्यान्डसँग पहिला ब्याटिङ गर्दै हारेको थियो । दुबईमा भएका पछिल्ला १७ टि२० खेलमा १६ टोली विजयी लक्ष्य पछ्याउँदा मात्र विजयी भएका छन् । आइपिएल फाइनलमा चेन्नई मात्र पहिला ब्याटिङ गर्दा पराजित भएको थियो ।

न्युजिल्यान्डको टोली :

केन विलियम्सन (कप्तान), टोड एश्टल, ट्रेन्ट बोल्ट, मार्क च्यापम्यान, डेभन कन्वे, मार्टिन गुप्टिल, काईल जेमिसन, ड्र्याल मिचेल, जिमी निशम, ग्लेन फिलिप्स, मिचेल सान्टनर, टिम सिफर्ट (विकेटकिपर), ईस सोधी, टिम साउथी र एडम मिल्ने ।

अष्ट्रेलिया टोली : 

आरोन फिन्च (कप्तान), एश्टन अगर, प्याट कमिन्स (उपकप्तान), जोश हेजलवुड, जोश इंग्लिस, मिचेल मार्श, ग्लेन म्याक्सवेल, केन रिचर्ड्सन, स्टिभ स्मिथ, मिचेल स्टार्क, मार्कस स्टोइनिस, मिचेल स्विपसन, म्याथ्यु वेड, डेविड वार्नर र एडम जाम्पा ।