एजेन्सी – आइसिसी टि२० विश्वकप २०२१ को उपाधि अष्ट्रेलियाले जितेको छ । अष्ट्रेलियाले फाइनलमा न्युजिल्यान्डलाई ८ विकेटले हराउँदै पहिलो पटक टि२० उपाधि जितेको हो ।

यस विश्वकपमा सर्वाधिक विशाल योगफल अफगानिस्तानविरुद्ध भारतले २ सय १० रन बनाएको थियो । इंग्ल्यान्डका ओपनर जस बटलरले श्रीलंकाविरुद्ध १ सय १ रनको शतकीय इनिङ खेलेका थिए । जुन यस विश्वकपमा बनेको एक मात्र शतक हो । सर्वाधिक रन पाकिस्तानका बाबर आजमले बनाए । सर्वाधिक छक्का बटलरले प्रहार गरे । प्रतियोगितामा २ सय माथि रन १० खेलाडीले बनाउन सके । सर्वाधिक रन बनाउनेमा शीर्ष १० मा भारतीय खेलाडी भने अट्न सकेनन् । टि२० विश्वकप २०२१ मा सर्वाधिक रन बनाउने ५ खेलाडी यस प्रकार छन् ।

१. बाबर आजम (पाकिस्तान)

पाकिस्तानलाई अपराजित रहँदै सेमिफाइनल सम्म पुर्याउन कप्तान बाबर आजमले उत्कृष्ट प्रदर्शन गरेका थिए । बाबरले ६ खेलमा ४ मा अर्धशतक सहित कुल ३ सय ३ रन बनाए । औसत ६० को रहँदा स्ट्राइकरेट १२६.२५ को रह्यो । प्रतियोगिताभर कुल २ सय ४० बल खेलेका बाबरले २८ चौका र ५ छक्का प्रहार गरेका थिए ।

सुपर १२ को समूह २ मा पहिलो खेलमा भारतलाई १० विकेटले हराउन बाबरले ५२ बलमा ६ चौका र २ छक्का सहित ६८ रनको अविजित इनिङ खेलेका थिए । बाबर न्युजिल्यान्डसँग ९ रनमा आउट भएका थिए । तेस्रो खेलमा अफगानिस्तानलाई ५ विकेटले हराउन बाबरले ४७ बलमा ५ चौका सहित ५१ रनको महत्वपूर्ण इनिङ खेलेका थिए ।

तेस्रो खेलमा नामिबियाविरुद्ध बाबरले ४९ बलमा ७ चौका सहित ७० रनको इनिङ खेलेका थिए । स्कटल्यान्डविरुद्ध बाबरले ४७ बलमा ५ चौका र ३ छक्का सहित ६६ रनको इनिङ खेलेका थिए । सेमिफाइनलमा अष्ट्रेलियाविरुद्ध बाबरले ३४ बलमा ५ चौका सहित ३९ रन बनाउँदै आउट भएका थिए ।

२. डेविड वार्नर (अष्ट्रेलिया)

अष्ट्रेलियालाई पहिलो पटक टि२० विश्वकप उपाधि जिताउन उत्कृष्ट प्रदर्शन गरेका वार्नर प्लेयर अफ द टुनामेन्ट (सर्वोत्कृष्ट) खेलाडी चुनिएका छन् । अष्ट्रेलियालाई उपाधि जिताउन वार्नरले ७ खेलमा ३ अर्धशतक सहित २ सय ८९ रन बनाएका थिए ।

१४६.७० को स्ट्राइक रेटमा वार्नरले ३२ चौका र १० छक्का प्रहार थिए । औसत ४८.१६ थियो । वार्नरले प्रतियोगिताभर कुल १ सय ९७ बल खेलेका थिए । फाइनलमा वार्नरले ३८ बलमा ४ चौका र ३ छक्का सहित ५३ रनमा आउट भएका थिए । वार्नरले सेमिफाइनलमा पाकिस्तानविरुद्ध ३० बलमा ३ चौका र ३ छक्का सहित ४९ रनको महत्वपूर्ण इनिङ खेलेका थिए । समूह चरणमा वेस्टइन्डिज विरुद्ध ८९ र श्रीलंकाविरुद्ध ६५ रनको इनिङ खेलेका थिए । दक्षिण अफ्रिकाविरुद्ध १४, इंग्ल्यान्डसँग १ र बंगलादेशविरुद्ध १८ रनमा आउट भएका थिए ।

३. मोहम्मद रिजवान (पाकिस्तान)

पाकिस्तानका ओपनर मोहम्मद रिजवान ६ खेलमा ३ अर्धशतक सहित २ सय ८१ रन बनाउँदै तेस्रो स्थानमा रहे । रिजवानले १२७.७२ को स्ट्राइक रेट र ७०.२५ को औसतमा रन बनाएका छन् । कुल २ सय २० बल खेल्दा २३ चौका र १२ छक्का प्रहार गरे । प्रतियोगितामा सर्वाधिक छक्का प्रहार सूचिमा दोस्रो स्थानमा छन् ।

भारतलाई १० विकेटले हराउन रिजवानले ५५ बलमा ६ चौका र ३ छक्का सहित ७९ रनको अविजित इनिङ खेलेका थिए । न्युजिल्यान्डसँग ३४ बलमा ५ चौका सहित ३३ रनमा आउट भएका थिए । अफगानिस्तानसँग ८ रनमा आउट भएका थिए । नामिबियासँग रिजवानले ५० बलमा ८ चौका र ४ छक्का सहित ७९ रनमा अविजित रहँदै प्लेयर द म्याच चुनिएका थिए । स्कटल्यान्डसँग १५ रनमा आउट भएका थिए । अष्ट्रेलियाविरुद्ध सेमिफाइनलमा ५२ बलमा ३ चौका र ४ छक्का सहित ६७ रन जोडेपनि फाइनलमा पुर्याउन सकेनन् ।

४. जस बटलर (इंग्ल्यान्ड)

उपाधिको दाबेदार इंग्ल्यान्ड सेमिफाइनलबाट बाहिरिएपनि ओपनर जस बटलरले उत्कृष्ट प्रदर्शन गरेका थिए । ६ खेलमा बटलरले २ सय ६९ रन बनाए । बटलरको स्ट्राइकरेट १५१.१२ रहँदा औसत ८९.६६ थियो । प्रतियोगिताभर १ सय ७८ बल खेलेका बटलरले २२ चौका र १३ छक्का प्रहार गरे ।

बटलर वेस्टइन्डिजसँग २४ रनमा रहँदा बंगलादेशसँग १८ रनमा आउट भएका थिए । अष्ट्रेलियाविरुद्ध ३२ बलमा ५ चौका र ५ छक्का सहित ७१ रनमा अविजित थिए । श्रीलंकाविरुद्ध ६७ बलमा ६ चौका र ६ छक्का सहित १ सय १ रनको उत्कृष्ट शतकीय इनिङको साथ प्लेयर अफ द म्याच चुनिएका थिए । दक्षिण अफ्रिकाविरुद्ध २६ र न्युजिल्यान्डविरुद्ध २९ रनमा आउट भए ।

५. चारिथ असलंका (श्रीलंका)

श्रीलंकाका शीर्षक्रमका ब्याटर चारिथ असलंका सर्वाधिक रन बनाउने खेलाडीको सूचिमा शीर्ष पाँचमा रहे । असलंकाले ६ खेलमा २ अर्धशतक सहित २ सय ३१ रन बनाएका थिए । प्रतियोगिताभर कुल १ सय ५७ बल खेलेका उनको स्ट्राइकरेट १४७.१३ रह्यो । उनले २३ चौका र ९ छक्का प्रहार गरे ।

श्रीलंकाले बंगलादेशलाई ५ विकेटले हराउन असलंकाले ४९ बलमा ५ चौका र ५ छक्का सहित ८० रनको अविजित इनिङ खेलेका थिए । अष्ट्रेलियासँग ३५, दक्षिण अफ्रिका र इंग्ल्यान्डसँग २१–२१ रनमा आउट भएका थिए । श्रीलंकाले अन्तिम खेलमा वेस्टइन्डिजलाई २० रनले हराउँदा असलंका प्लेयर अफद म्याच चुनिएका थिए । असलंकाले ४१ बलमा ८ चौका र १ छक्का सहित ६८ रनको इनिङ खेलेका थिए ।