धरान (हाम्रो खेलकुद) – स्थानीय प्रो निरज तामाङले धरान गल्फ क्लबमा सोमबारदेखि सुरु भएको सुर्य नेपाल इस्टर्न ओपनमा अग्रता लिएका छन् । सुर्य नेपाल गल्फ टुर २०२१-२२ को दोस्रो प्रतियोगितामा १३ औं दक्षिण एसियाली खेलकुदका स्वर्णधारी समेत रहेका निरजले पहिलो दिन ३ स्ट्रोकको अग्रता लिएका हुन् ।

धरान गल्फ क्लबमा ३ अन्डर ६७ को स्कोर लेखाउँदै निरज पहिलो दिन अन्डर पार खेल्ने एकमात्र गल्फर बने । निरजलाई सुर्यप्रसाद शर्माले इभन पार ७० स्कोरसहित पछ्याइरहेका छन् । निरजले फ्रन्ट नाइनमा १ अन्डर ३५ तथा ब्याक नाइनमा २ अन्डर ३२ को स्कोर लेखाए । उनले चौथो होलमा बोगी खेपेपनि पाँचौ र सातौं होलमा बर्डी लेखाए । १२ औं होलमा इगल प्रहार गरेका निरजले १२ औं होलमा बोगी तथा १५ औं होलमा बर्डी लेखाए ।

अर्का स्थानीय गल्फर शुक्रबहादुर राई र टंकबहादुर कार्की १ ओभर ७१ स्कोरसहित तेस्रो स्थानमा छन् । पाँचौ स्थानमा ३ ओभर ७३ स्कोर जोडेका नेपाल नम्बर १ भुवन नगरकोटी, धनबहादुर थापा, संजय लाम र रवी खड्का रहेका छन् । ४ ओभर ७४ स्कोरका साथ भुवन कुमार रोक्का नवौं स्थानमा छन् । जारी सिजनको पहिलो प्रतियोगिता काठमाडौं ओपनका विजेता जयराम श्रेष्ठ ८ ओभर ७८ स्कोरका साथ समग्रमा २८ औं स्थानमा छन् ।

एमेच्योरतर्फ ५ ओभर ७५ स्कोरसहित स्थानीय गल्फर जितेन्द्र राई, युवराज भुजेल र सद्भाव आचार्य छन् । १३ औं सागका स्वर्णधारी तथा काठमाडौं ओपनका एमेच्योर विजेता सुभाष तामाङले ७ ओभर ७७ स्कोरका साथ एमेच्योरतर्फ छैटौं स्थानमा छन् । उनीभन्दा अघि ६ ओभर ७६ स्कोरका साथ स्थानीय गल्फरद्वय बुद्धिमान सुनुवार र जीवन राई रहेका छन् । संदेश खनाल र विदुर तामाङको पनि ७ ओभर ७७ स्कोर रहेको छ ।

तीन दिन चल्ने प्रतियोगिताको दोस्रो दिन पछि २१ व्यावसायिक र कम्तिमा ६ एमेच्योर गल्फरले कट बनाउनेछन् । प्रतियोगिताको विजेताले एक लाख ३५ हजार तथा दोस्रो र तेस्रो हुने खेलाडीले क्रमश ८८ हजार र ६५ हजार नगद पुरस्कार पाउनेछन् । दोस्रो दिनसम्म ३६ होलको खेल पछि अन्तिम दिन कट हुनेछ ।

सहभागी ३० प्रो गल्फर मध्ये कट बनाउने २१ खेलाडीले नगद पुरस्कार प्राप्त गर्नेछन् । प्रतियोगिताको अन्तिम दिन प्रोफेसनल र एमेच्योर खेलाडी सम्मिलित प्रो–एम इभेन्ट हुनेछ ।