पोखरा (हाम्रो खेलकुद) – गण्डकी प्रदेशको पुरुष भलिबल टोेेलीका मिडल ब्लकर प्रेम कुमालले खुट्टा भाँचिएपछि नवौं राष्ट्रिय खेलकुद गुमाउने भएका छन् ।

शुक्रबार पोखरा रंगशालास्थित भलिबल कोर्टमा बागमती प्रदेशविरुद्ध भएको खेलमा प्रेमले चोट बोकेका थिए । खेलको तेस्रो सेटमा उनको देव्रे खुट्टामा चोट लागेको थियो । उनी कोर्टमा लड्दा आफ्नै टोलीका खेलाडी उनीमाथि लडेका थिए ।

गण्डकीका प्रशिक्षक रमेश केसीले उनको दुई वटा हड्डी भाँचिएको जानकारी दिए । ‘प्रेमको देव्रे खुट्टाको दुई वटा हड्डी भाँचिएको छ । चोट लागेपछि कोर्टबाट नै अन्नपूर्ण अस्पतालमा लगेका थियौं । परिक्षण गरेपछि चोट हेरेर प्लास्टर लगाएपछि होटेलमा नै ल्याएर राखिएको छ,’ केसीले भने ।

गण्डकीले खेल जित्दै समूह विजेता बनेपनि अब प्रेमले बाँकी खेल गुमाउने छन् । उनलाई ठिक हुन डेढ महिना लाग्ने बुझिएको छ ।

बागमती प्रदेशलाई ३–१ ले हराउँदै समूह डीको विजेता बनेको हो । समूह डीको खेल अघि नै दुवै टोली क्वार्टफाइनल पुगिसकेका थिए । गण्डकीले बागमतीलाई २५–२०,१५–२५,२५–१८ र २५–१३ ले पराजित गरेको थियो ।

समूह विजेता गण्डकीले सेमिफाइनल प्रवेशका लागि समूह बीको उपविजेताको सामना गर्नेछ । त्यस्तै बागमतीले समूह बीको विजेतासँग प्रतिस्पर्धा गर्नेछ । समूह बीमा आर्मी, प्रदेश १, मधेश प्रदेश रहेका छन् ।

त्यसअघि पहिलो खेलमा विभागीय टोली नेपाल पुलिस क्लबले विजयी सुरुवात गरेको छ । पुलिसले कर्णाली प्रदेशलाई ३–० को सोझो सेटमा पराजित गरेको थियो । पुलिसले कर्णालीमाथि २५–१६, २५–११ र २५–१२ को सोझो सेटमा जित निकालेको हो । यस जितसँगै पुलिसले समूह ‘ए’ बाट क्वाटरफाइनल पुग्ने सम्भावना बलियो बनाएको छ । कर्णाली अंकविहीन हुँदा लुम्बिनीले कुनै खेल खेलेको छैन ।