काठमाडौं (हाम्रो खेलकुद) – आयरल्यान्डका युवा ब्याटर ह्यारी टेक्टरले नेपालले दिएको जीवनदानको फाइदा उठाउँदै आइसिसी विश्वकप छनोटको प्लेअफ खेलमा अर्धशतक प्रहार गरेका छन् ।

जितको लागि २ सय ६९ रनको विजयी लक्ष्य पछ्याएको आयरल्यान्डले २१ ओभरमा ३ विकेट गुमाउँदै १ सय ६ रन बनाएको छ । ह्यारी टेक्टर ६२ बलमा ४ चौका र २ छक्कासहित ५० रनमा क्रिजमा छन् । उनलाई लोर्कान टकरले १३ रनमा साथ दिएका छन् ।

टेक्टरले अर्धशतक प्रहार गर्नुअघि नेपालबाट महत्वपूर्ण जीवनदान पाएका थिए । स्पिनर सन्दीप लामिछानेको १५ औं ओभरको तेस्रो बलमा ह्यारी टेक्टरको क्याच किशोर महतोले लङअनमा ब्यक्तिगत २१ रनमा छाड्न पुगेका थिए ।

त्यसअघि नेपालले पावर प्लेमा एक विकेट लिएको थियो । तीव्र गतिका बलर करण केसीले पाँचौं ओभरको पाँचौं बलमा ओपनर एन्डी म्याकब्रिनलाई १७ रनमा प्वाइन्टमा कुशल भुर्तेलबाट क्याच आउट भए ।

उनले १९ बलमा ३ चौका प्रहार गरे । अर्को ओभरमा किशोर महतोले कप्तान एन्डी बालबर्नीलाई प्वाइन्टमै एक रनमा दीपेन्द्रबाट क्याच गराएपछि राम्रो सुरुवात गरेको हो । आफ्नो ओडिआई करिअरको दोस्रो खेल खेलेका किशोरको यो पहिलो विकेट हो ।

गुलशनले १२ औं ओभरको अन्तिम बलमा ओपनर पल स्टरलिङलाई १५ रनमा बोल्ड आउट गरे । उनी एज लागेर बोल्ड हन पुगेका थिए । स्टरलिङले २४ बलमा २ चौका प्रहार गरे ।