काठमाडौं (हाम्रो खेलकुद) – नेपाल पुलिस क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब लिग प्रतियोगिता पहिलो खेलमा गण्डकी प्रदेशमाथि रोमान्चक जित हात पारेको छ । पुलिसले गण्डकीमाथि ३-२ को सेटमा जित हात पारेको हो । योसँगै पुलिसले लिगमा २ र गण्डकीले एक अंक जोडेका छन् ।

राष्ट्रिय खेलकुद परिषद् (राखेप) को कभर्डहलमा भएको खेलमा पुलिसले २५-२१, २५-१६, १३-२५, २४-२६ र १५-१० को सेटमा जित हात पारेको हो ।

पहिलो सेट एक समय २१-२१ को बराबरीमा थियो । तर त्यो अवस्थाबाट पुलिसले लगातार चार अंकका साथ जितेको थियो । दोस्रो सेट गण्डकीको सम्झन लायक रहेन । सुरुवातनै १०-० को अवस्थामा थियो । पुलिसका खेलाडीले सर्भिस विगारेपछि पहिलो अंक पाएको थियो ।

तर तेस्रो सेटमा भने गण्डकीले फरक किसिमको प्रदर्शन गर्यो । तेस्रो सेटमा लगातार १० अंक जोडेपछि गण्डकी २०-९ को मजबुत अवस्थामा थियो । त्यसैले सहजै जित हात पार्यो ।

चौथो सेटमा भने गण्डकीले अविश्सनीय जित हात पार्यो । गण्डकी १९-२४ को खेल लगातार ७ अंक ल्याउँदै २६-२४ ले उल्टाएको थियो । उक्त अविश्वसनीय सेट जिताउन भारतीय जोजेबिनले लगातार ७ अंक जोडेका थिए । उनको शक्तिशाली सर्भिसको सहयोगमा उक्त खेल पल्टाएको थियो ।

निर्णायक खेलमा भने गण्डकीको प्रदर्शन राम्रो हुन सकेन । सुरुवातमै ८-३ ले पछि परेपछि जित कठिन बनेको थियो । गण्डकी पराजित भएपनि रविन केसी, हिमाल सुनारी, सुजन चोखाल र जोजेबिनको प्रदर्शन उत्कृष्ट रह्यो ।

तीन भारतीय खेलाडी सम्मिलित गण्डकीको टोलीमा सुरुमा भने तालमेलको कमी देखिएको थियो । पुलिसको जितमा रविन चन्द र विशाल विकले सानदार प्रदर्शन गरे । खेलको प्लेयर अफ द म्याच विशाल विक चुनिए ।

त्यसअघि आज भएको पहिलो खेलमा त्रिभुवन आर्मी क्लबले सैलुङ बागडुङ्गा स्पोर्ट्स क्लबलाई ३-० को सोझो सेटमा पराजित गर्यो । आर्मीले सैलुङलाई २५-८, २५-१३ र २५-१७ ले पराजित गरेको हो ।

आजनै भएको महिलातर्फ पहिलो खेलमा नेपाल पुलिस क्लबले गण्डकी प्रदेशलाई २५–१०, २५–१०, २५–११ ले पराजित गर्दै विजयी सुरुवात गरेको थियो । पुरुषतर्फ प्रतियोगितामा टिप टम हेल्प नेपाल स्पोर्ट्स क्लब, त्रिभुवन आर्मी क्लब, नेपाल एपिएफ क्लब, नेपाल पुलिस क्लब, गण्डकी प्रदेश, दावली मिलन क्लब र सैलुङ बागढुङ्गा स्पोर्ट्स क्लब छन् ।

महिलातर्फ नेपाल पुलिस क्लब, त्रिभुवन आर्मी क्लब, होङ्गान्जी न्यू डायमण्ड स्पोर्ट्स क्लब, नेपाल एपिएफ क्लब, गण्डकी प्रदेश र एभरेष्ट भलिबल टेक्निकल सेन्टर छन् । महिला र पुरुष दुवैतर्फको शीर्ष दुई टोली फाइनल खेल्नेछन् । दिनको अन्तिम खेलमा आज दिउँसो २ बजे एपिएफ र दावालीबीच प्रतिस्पर्धा हुनेछ ।