काठमाडौं (हाम्रो खेलकुद) – त्रिभुवन आर्मी क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब च्याम्पियनसिपमा लगातार दोस्रो जित हात पारेको छ । आर्मीले दावाली मिलन क्लबलाई सोझो सेटमा पराजित गर्दै लिगमा शीर्ष स्थान कायम राखेको छ ।

राष्ट्रिय खेलकुद परिषद्(राखेप) को कभर्ड हलमा भएको खेलमा आर्मीले २५-१९, २५-११ र २५-२० को सोझो सेटमा हात पारेको हो । पहिलो सेटमा दुबै टोलीका खेलाडीले लगातार सर्भिसमा गल्ती गर्न पुगेका थिए । दोस्रो सेटमा भने आर्मीले सहज जित हात पार्यो ।

तेस्रो सेटमा भने दावालीले कडा प्रतिस्पर्धा गरेको थियो । ८-८ मा दावालीले बराबरी गरेको थियो । दावाली १३(१२ बाट अग्रता लिन थालेको थियो । त्यसपछि लगातार अग्रता लिँदा आर्मीले १९ मा गएर भेटाएको थियो ।

आर्मीले तेस्रो सेटमा आफ्ना प्रमुख खेलाडीलाई भने बेन्चमा राखेको थियो । २०-२० को बराबरी अवस्थाबाट आर्मीले लगातार अंक जोड्दै जित पक्का गरेको थियो ।

आर्मीले पहिलो खेलमा शैलुङ बागढुङ्गा स्पोर्ट्स क्लबलाई ३-० को सोझो सेटमा पराजित गरेको थियो । आर्मीले सोमबार गण्डकी प्रदेशसँग दिउँसो ४ बजे प्रतिस्पर्धा गर्नेछ । आज दिउँसो १२ बजे नेपाल एपिएफ क्लब र गण्डकी प्रदेशबीच प्रतिस्पर्धा हुँदैछ ।

आज नै भएको पहिलो खेलमा टिपटप हेल्प नेपालले सैलुङमाथि २५-१२, २५-१५ र २५-१९ को सहज जित हात पारेको हो । तीन पाकिस्तानी खेलाडी सम्मिलित हेल्प नेपालले खेलमा एकल प्रदर्शन गरेको । पाकिस्तान भलिबल टोलीका कप्तान अ‍ैमल खान र मजहर अलीको स्पाइक र सर्भिस सामु सैलुङका खेलाडी कमजोर देखिएका थिए ।

महिलातर्फ दिउँसो २ बजे एपिएफ र आर्मीबीच प्रतिस्पर्धा हुनेछ । दिउँसो ४ बजे न्यु डायमन्ड र गण्डकीबीच प्रतिस्पर्धा हुनेछ । दिनको अन्तिम खेलमा ६ बजे पुलिस र एभरेष्टबीच प्रतिस्पर्धा हुनेछ ।