काठमाडौं (हाम्रो खेलकुद) – नेपाल पुलिस क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब च्याम्पियनसिपमा लगातार दोस्रो जित हात पारेको छ । पुलिसले आइतबार एभरेष्ट भलिबल क्लबलाई ३(० को सोझो सेटमा पराजित गर्दै लगातार दोस्रो जित हात पारेको हो ।

पुलिसले एभरेष्टमाथि २५-१७, २५-२२ र २५-६ को सोझो सेटमा पछि पारेको थियो । पहिलो सेट सहजै जितेको थियो । दोस्रो सेटमा पुलिस एक समय १५-६ को मजबुत अवस्थामा थियो । तर एभरेष्टले लगातार ६ अंक बटुल्दै एभरेष्ट १२-१५ को अवस्थामा पुगेको थियो । १२-१६ को अवस्थाबाट एभरेष्टले १५-१६ को अवस्था बनाएको थियो । १६-२० को अवस्थाबाट एभरेष्टले लगातार चार अंकका साथ २०-२० को अवस्थामा पुर्याएको थियो ।

उषा भण्डारीको स्पाइक बारिन पुगेपछि एभरेष्टले अग्रता लिँदै २१-२० को अवस्था बनाएको थियो । पुलिसले यस अवस्थामै दुबै टाइम आउट सकेको थियो । टाइम आउट पछि भने लगातार चार अंकका साथ जितको आधार तय गरेको थियो ।

तेस्रो सेटमा भने सुरुवाती समय पुलिस १२-० को अवस्थामा थियो । पुलिसले पहिलो खेलमा गण्डकी प्रदेशलाई ३-० को सोझो सेटमा पराजित गरेको थियो । पुलिसले सोमबार त्रिभुवन आर्मी क्लबसँग दिउँसो १२ बजे खेल्नेछ । एभरेष्टले विहान १० बजे न्यू डायमण्डसँग खेल्नेछ ।

पुरुषतर्फ प्रतियोगितामा टिप टम हेल्प नेपाल स्पोर्ट्स क्लब, त्रिभुवन आर्मी क्लब, नेपाल एपिएफ क्लब, नेपाल पुलिस क्लब, गण्डकी प्रदेश, दावली मिलन क्लब र सैलुङ बागढुङ्गा स्पोर्ट्स क्लब छन् ।

महिलातर्फ नेपाल पुलिस क्लब, त्रिभुवन आर्मी क्लब, होङ्गान्जी न्यू डायमण्ड स्पोर्ट्स क्लब, नेपाल एपिएफ क्लब, गण्डकी प्रदेश र एभरेष्ट भलिबल टेक्निकल सेन्टर छन् । महिला र पुरुष दुवैतर्फको शीर्ष दुई टोली फाइनल खेल्नेछन् ।