काठमाडौं (हाम्रो खेलकुद) – नेपाल पुलिस क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब च्याम्पियनसिपमा लगातार तेस्रो जितका साथ फाइनल सम्भावना मजबुत बनाएको छ ।

पुलिसले अर्को विभागीय टोली त्रिभुवन आर्मी क्लबलाई ३-० को सोझो सेटमा पराजित गरेको हो । राष्ट्रिय खेलकुद परिषद् (राखेप) को कभर्डहलमा सोमबार दिउँसो भएको खेलमा पुलिसले २५-१८, २५-१२ र २५-१८ को सहज जित हात पारेको हो । आर्मीले कुनैपनि सेटमा पुलिसलाई दबाबमा राख्न सकेन ।

पुलिसले पहिलो खेलमा गण्डकी प्रदेश र दोस्रो खेलमा एभरेष्ट भलिबल क्लबलाई ३-० को सोझो सेटमा पराजित गरेको थियो । त्यसअघि न्यू डायमण्डले एभरेष्टमाथि २५-१७, २५-१२ र २५-१२ को सहज जित हात पारेको हो ।

पुलिस ३ खेलमा ९ अंकका साथ शीर्षस्थानमा छ । न्यू डायमण्ड २ खेलमा ३ अंकका साथ दोस्रो स्थानमा छ । एपिएफ २ खेलमा ५ अंकका साथ तेस्रो स्थानमा छ ।

पुरुषतर्फ आजको खेलमा दिउँसो २ बजे हेल्प नेपाल र दावाली मिलन, दोस्रो खेलमा दिउँसो ४ बजे आर्मी र गण्डकी तथा दिनको अन्तिम खेलमा पुलिस र शैलुङ बागढुङ्गाबीच प्रतिस्पर्धा हुनेछ ।

पुरुषतर्फ प्रतियोगितामा टिप टम हेल्प नेपाल स्पोर्ट्स क्लब, त्रिभुवन आर्मी क्लब, नेपाल एपिएफ क्लब, नेपाल पुलिस क्लब, गण्डकी प्रदेश, दावली मिलन क्लब र सैलुङ बागढुङ्गा स्पोर्ट्स क्लब छन् ।

महिलातर्फ नेपाल पुलिस क्लब, त्रिभुवन आर्मी क्लब, होङ्गान्जी न्यू डायमण्ड स्पोर्ट्स क्लब, नेपाल एपिएफ क्लब, गण्डकी प्रदेश र एभरेष्ट भलिबल ट्रेनिङ सेन्टर छन् । महिला र पुरुष दुवैतर्फको शीर्ष दुई टोली फाइनल खेल्नेछन् ।