काठमाडौं (हाम्रो खेलकुद) – नेपाल एपिएफ क्लबले सातौं प्रधानमन्त्री कप एनभिए वुमन्स तथा पुरुष राष्ट्रिय भलिबल क्लब लिगमा सैलुङ बागढुङ्गामाथि रोमान्चक जित हात पारेको छ । सैलुङलाई सोझो सेटमा हराउँदै एपिएफले लगातार तेस्रो जितको साथ फाइनल सम्भावना बलियो बनाएकोछ ।

राष्ट्रिय खेलकुद परिषद् (राखेप) को कभर्ड हलमा भएको खेलमा एपिएफले २६–२४, २५–१५ र २८–२६ को जित हात पारेको हो । पहिलो सेट जित हात पार्न एपिएफलाई निकै कठिन परेको थियो ।

सैलुङले ५–२ को अग्रता लिदै राम्रो सुरुवात गरेको थियो । उच्च प्रतिस्पर्धा भएो खेलमा १७–१७ बराबरी अवस्थाबाट एपिएफले लगातार दुई अंक जोडेको थियो । निकै रोमान्चक खेलमा एपिएफ २६ अंकमा पुगेर जित निकाल्न पुगेको थियो ।

दोस्रो सेटमा भने सैलुङले सुरुवाती समय अग्रता लिएको थियो । तर एपिएफले लगातार ९ अंक बटुलेपछि सहज जितको आधार तय गरेको थियो । तेस्रो सेटमा भने सुरुवातमा उच्च प्रतिस्पर्धा थियो । एक समय ८–८ को बराबरीमा थियो । एपिएफ एक समय २२–१६ को बलियो अवस्थामा थियो ।

तर उक्त अवस्थाबाट सैलुङले खेलमा नाटकीय रुपमा पूनरागमन गरेको थियो । एपिएफले आफ्नो पहिलो रोजाईका खेलाडीलाई त्यो समय विश्राम दिएको थियो । रोमन्चक खेलमा हेमन्त मल्लले सर्भिस विगारेपछि म्याच प्वाइन्टको अवसर गुमाएका थिए । लगत्तै निर्णायक समयमा नविन महतोले पनि सर्भिस बिगारेपछि एपिएफले जित निकालेको थियो ।

एपिएफले पहिलो खेलमा दावाली मिलनलाई ३–० र दोस्रो खेलमा गण्डकी प्रदेशलाई ३–१ को सेटमा पराजित गरेको थियो । एपिएफले बुधबार आर्मीसँग खेल्नेछ । उक्त खेल जितेमा फाइनल सम्भावना बलियो हुनेछ ।