काठमाडौं (हाम्रो खेलकुद) – त्रिभुवन आर्मी क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल लिगमा एभरेष्ट क्लबमाथि सहज जित हात पारेको छ । आर्मीले एभरेष्टलाई ३–० को सोझो सेटमा पराजित गरेको हो । फाइनल दौडबाट बाहिरि सकेको आर्मीलाई यो अंकले प्रतियोगितामा तेस्रो स्थानमा अन्त्य गर्ने सम्भावना कायमै राखेको छ ।

राष्ट्रिय खेलकुद परिषद् (राखेप) को कभर्डहलमा भएको खेलमा आर्मीले २५–१२, २५–१९ र २५–१९ ले पराजित गरेको हो । आर्मीसँग पराजित भएपनि एभरेष्टकी युवा खेलाडी निशा चौधरी प्लेयर अफ द म्याच चुनिन् ।

पहिलो सेटमा एभरेस्टले आर्मीविरुद्ध ४-० को सुरुवात गरेको थियो । तर आर्मीले लगातार ८ अंक जोडेपछि एभरेस्टले टाइम आउट लिन परेको थियो । लगातार १६ अंक गुमाएपछि एभरेस्टले पहिलो अंक बटुलेको थियो । आर्मीले २५–१२ को सहज जित हात पारेको थियो ।

दोस्रो सेटमा आर्मीले सहज जित हात पारेको थियो । तेस्रो सेटमा भने एभरेष्टले सुरुवात देखिनै राम्रो प्रतिस्पर्धा गरेको थियो । एक समय ८–८ को बराबर अवस्था थियो । तर त्यसपछि भने लगातार अंक गुमाउन पुग्यो ।

एभरेष्ट ५ खेलमा सबैमा हारका साथ पुछारमा रहेर बाहिरियो । आर्मी ४ खेलमा १ मा जित र ३ मा हारसहित ५ अंक्का साथ चौथो स्थानमा छ । त्यस्तै गण्डकी प्रदेश ४ खेलमा १ मा जित र ३ मा हारसहित ३ अंकका साथ पाँचौं स्थानमा छ ।

नेपाल पुलिस क्लब ४ खेलमा १२ अंकका साथ फाइनलमा पुगेको छ । अव न्यु डायमण्ड र नेपाल एपिएफ क्लब मध्य एक टोली फाइनलमा पुग्नेछन् । अव केहि समयमा एपिएफ र न्यु डायमण्डबीच प्रतिस्पर्धा हुँदैछ ।

न्यु डायमण्ड ३ खेलमा ८ अंकका साथ दोस्रो स्थानमा छ । एपिएफ ४ खेलमा ४ खेलमा ३ मा जित र १ मा हारसहित ८ अंक भएपनि तेस्रो स्थानमा छ ।