काठमाडौं (हाम्रो खेलकुद) – टिपटप हेल्प नेपालले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब लिगमा नेपाल एपिएफ क्लबमाथि ३–२ को नाटकीय जितका साथ फाइनल नजिक पुगेको छ । हारको मुखबाट नाटकीय पूनरागमन गर्दै हेल्प नेपालले फाइनल सम्भावना बलियो बनाएको हो ।

राष्ट्रिय खेलकुद परिषद् (राखेप) को कभर्ड हलमा भएको खेलमा हेल्प नेपालले २७–२५, २५–१७, २१–२५, २३–२५ र १६–१४ ले जित्दै फाइनलमा पुगेको हो । एपिएफ सुरुवाती दुई सेटमा पराजित हुन पुगेको थियो । तर त्यसपछि सानदार पुनरागमन गर्दै टेपटपलाई स्तब्ध नजिक पुर्याएको थियो ।

अन्तिम तथा निर्णायक सेटमा एपिएफ ८-३ को मजबुत अवस्थामा थियो । सहज जित निकाल्ने अनुमान गरिएको थियो । तर उक्त अवस्थाबाट हेल्प नेपालले सानदार पूनरागमन गरेको थियो । एपिएफ म्याच प्वाइन्टमा पुग्दा १४-११ को अवस्थामा थियो । उक्त अवस्थाबाट हेल्प नेपालले लगातार पाँच अंक जोड्दै जित हात पारेको हो ।

हेल्प नेपालले अन्तिम खेल शुक्रबार आर्मीसँग खेल्नेछ । उक्त खेलमा विजयी भएमा शीर्ष स्थानमा रहँदै फाइनल खेल्नेछ । यदि पराजित हुँदा पनि फाइनल खेल्ने सम्भावना रहन्छ ।

तर नेपाल पुलिस र नेपाल एपिएफको नतिजामा भर पर्नेछ । केहि समयमा नेपाल पुलिस क्लब र त्रिभुवन आर्मी क्लबबीच प्रतिस्पर्धा हुँदैछ । यस खेलको विजेता फाइनलमा पुग्ने उच्च सम्भावना रहन्छ । शुक्रबार पुलिसले एपिएफसँग खेल्नेछ ।

हेल्प नेपाल ५ खेलमा १३ अंकका साथ शीर्षस्थानमा छ । आर्मी ४ खेलमा ११ अंकका साथ दोस्रो स्थानमा छ । आर्मी र हेल्प नेपाल दुबै अपराजित छन् । नेपाल एपिएफ क्लब ५ खेलमा ३ मा जित र २ मा हारका साथ ११ अंकका साथ तेस्रो स्थानमा छ । नेपाल पुलिस क्लब ४ खेलमा ३ मा जित र १ मा हारसहित ९ अंकका साथ चौथो स्थानमा छ ।