काठमाडौं (हाम्रो खेलकुद) – नेपाल पुलिस क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब लिगमा त्रिभुवन आर्मी क्लबमाथि सानदार जित हात पारेको छ । पुलिसले आर्मीलाई ३-० को सोझो सेटमा पराजित गर्दै फाइनल पुग्ने सम्भावना बलियो बनाएको छ ।

राष्ट्रिय खेलकुद परिषद् (राखेप) को कभर्डहलमा भएको खेलमा पुलिसले आर्मीलाई २५–२१,२८–२६ र २५–१५ को सानदार जित हात पारेको हो । पुलिसको सानदार सामु आर्मीको प्रदर्शन राम्रो हुन सकेन ।

आर्मीले शुक्रबार टिपटप हेल्प नेपालसँग खेल्नेछ । फाइनलमा पुग्न उक्त खेल जित्नुपर्ने दबाब छ । पुलिसले शुक्रबार नेपाल एपिएफ क्लबसँग खेल्नेछ । उक्त खेलमा पुलिस विजयी भएमा फाइनलमा पुग्ने देखिन्छ । पुलिसको जितमा सानदार प्रदर्शन गरेका विशाल विक खेलको प्लेयर अफ द म्याच चुनिए ।

हेल्प नेपाल ५ खेलमा १३ अंकका साथ शीर्षस्थानमा छ । नेपाल पुलिस क्लब ५ खेलमा ४ मा जित र १ मा हारसहित १२ अंकका साथ दोस्रो स्थानमा छ । आर्मी ५ खेलमा ४ मा जित र १ मा हारसहित ११ अंकका साथ तेस्रो स्थानमा छ ।

नेपाल एपिएफ क्लब ५ खेलमा ३ मा जित र २ मा हारका साथ ११ अंकका साथ चौथो स्थानमा छ । शुक्रबार टिपटप नेपाल र आर्मीबीच प्रतिस्पर्धा हुनेछ । अर्को खेलमा एपिएफ र पुलिसबीच प्रतिस्पर्धा हुनेछ । यी दुई खेलले फाइनल समिकरण पूरा हुनेछ ।