काठमाडौं (हाम्रो खेलकुद) – सातौं प्रधानमन्त्री कप एनभिए राष्ट्रिय भलिबल लिगको महिलातर्फ फाइनलमा नेपाल पुलिस क्लब र नेपाल एपिएफ क्लबबीच प्रतिस्पर्धा हुने भएको छ । न्यु डायमण्ड स्पोर्ट्स एकेडेमी पुलिससँग पराजित भएपछि एपिएफ फाइनलमा पुगेको हो ।

राष्ट्रिय खेलकुद परिषद् (राखेप) को कभर्डहलमा भएको खेलमा पुलिसले न्यू डायमण्डलाई २५-२०, २५–१४ र २५-१७ ले पराजित गर्यो । प्रतिभा माली पूर्णरुपमा फिट नहुँदा न्यु डायमण्डले राम्रो गर्न सकेन । पुलिस ५ खेलमा १५ अंकका साथ शीर्ष स्थानमा रहँदै फाइनल खेलेको हो ।

नेपाल एपिएफ क्लब ५ खेलमा ४ मा जित र १ मा हारसहित ११ अंकका साथ दोस्रो स्थानमा रह्यो । न्यु डायमण्ड ५ खेलमा ३ मा जित र २ मा हारका साथ ८ अंकका साथ तेस्रो स्थानमा रहेर बाहिरियो । आजनै भएको पहिलो खेलमा आर्मीले गण्डकी प्रदेशलाई ३-० को सोझो सेटमा पराजित गर्दै चौथो बन्यो ।

आर्मीले गण्डकीलाई २५-१८, २५-१२ र २५-१५ को सेटमा हराउँदै चौथो बन्यो । आर्मी ५ खेलमा २ मा जित र ३ मा हारका साथ ८ अंक जोड्दै चौथो स्थानमा रहेर बाहिरियो । गण्डकी ५ खेलमा १ मा जितका साथ पाँचौं र एभरेष्ट जित विहीन हुँदै बाहिरियो ।
फाइनल शनिबार हुनेछ । लिगमा पुलिसले एपिएफलाई ३-० को सोझो सेटमा पराजित गरेको थियो ।

पुरुषतर्फ भने त्रिभुवन आर्मी क्लब, नेपाल पुलिस क्लब, नेपाल एपिएफ क्लब र टिपटप हेल्प नेपाल मध्य दुई टोली फाइनल खेल्नेछन् । आज हेल्प नेपालले आर्मी तथा पुलिसले एपिएफसँग खेल्दैछ । यी दुई खेलको नजिता फाइनलमा पुग्न चारै टोलीको लागि निकै महत्वपूर्ण छ ।