एजेन्सी – कप्तान रोहित पौडेल नेपाली क्रिकेटमा रिभ्यु लिने पहिलो खेलाडी बनेका छन् । उनले एसिया कपमा पाकिस्तानविरुद्ध पहिलो ओभरमै रिभ्यु लिएका थिए । तीव्र गतिका बलर शाहिन शाह अफ्रिदीको पहिलो ओभरको अन्तिम बलमा रोहित एलबीडब्लू आउट भएका थिए ।

उक्त बलमा रोहितले पहिलो रिभ्यु लिएका थिए । तर रोहितको रिभ्यु सफल हुन नसकेपछि आउट हुँदै पेभेलिएन फर्के । दुई मध्य एक रिभ्यु नेपालको सकिएको छ । बलिङमा भने नेपालले कुनैपनि रिभ्यु लिएन । नेपालले खेलेका यसअघिका कुनैपनि प्रतियोगिता र सिरिजमा रिभ्यु उपलब्ध थिएन ।

पाकिस्तानका तीव्र गतिका बलर शाहिन शाह अफ्रिदीले एसिया कपमा नेपालविरुद्ध पहिलो ओभरमै दुई विकेट लिएका छन् । जितको लागि ३ सय ४३ रनको विशाल विजयी लक्ष्य पछ्याएको नेपालले ३ ओभरमा ३ विकेट गुमाउँदै १८ रन बनाएको छ । क्रिजमा सोमपाल कामी र आरिफ शेख छन् ।

नेपालका ओपनर कुशल भुर्तेलले शाहिन शाह अफ्रिदीलाई सुरुवाती दुई बलमा चौका प्रहार गर्दै सुरुवात गरेका थिए । तर लेग साइडको पाँचौं बलमा एज लागेर विकेटकिपर मोहम्मद रिजवानबाट ९ रनमा क्याच आउट भए ।

लगत्तै अर्को बलमा रोहित पौडेल गोल्डेन डक आउट भए । नसिम शाहको दोस्रो ओभरको चौथो बलमा आसिफ शेख एज लागेर स्लिपमा इफ्तिखर अहमदबाट पाँच रनमा क्याच आउट भए ।

त्यसअघि मुल्तान क्रिकेट रंगशालामा टस जितेर पहिला ब्याटिङ रोजेको पाकिस्तानले निर्धारित ५० ओभरमा ६ विकेट गुमाउँदै ३ सय ४२ रन बनाएको थियो ।

पाकिस्तानका बाबर आजमले १ सय ३१ बलमा १४ चौका र ४ छक्कासहित १ सय ५१ रनको सानदार शतकीय इनिङ खेले । इफ्तिखार अहमद ७१ बलमा ११ चौका र ४ छक्कासहित १ सय ९ रनमा अविजित रहेका थिए ।