काठमाडौं (हाम्रो खेलकुद) – नेपालले त्रिकोणात्मक टि२० आई सिरिजमा युएईविरुद्ध तीन विकेट गुमाएको छ । माथिल्लो मुलपानी क्रिकेट मैदानमा जितको लागि १ सय ४१ रनको मध्यम विजयी लक्ष्य पछ्याएको नेपालले १० ओभरमा ३ विकेट गुमाउँदै ६३ रन बनाएको छ ।

नेपालका दीपेन्द्रसिंह ऐरी ७ र रोहित पौडेल ६ रनमा क्रिजमा छन् । ओपनर कुशल भुर्तेल १४ बलमा १ चौकासहित १४ रनमा आउट भए । स्पिनर निलान्श केश्वानीको बलमा कुशल अली नासिरबाट क्याच आउट भए ।

कुशल मल्ल ९ बलमा २ चौकासहित ११ रनमा रन आउट भए । एक रन लिन खोज्नेक्रममा उनी केहि अघि बढेपनि अलमलमा परेर पुन फर्किन खोज्दा रन आउट भएका थिए ।

अली नासिरको बलमा आसिफ शेख मोहम्मद वासिमबाट मिडअनमा २३ रनमा आउट भए । आसिफले २७ बलमा २ चौका र १ छक्का प्रहार गरे ।

त्यसअघि टस पहिला ब्याटिङको निम्तो पाएको युएईले निर्धारित २० ओभरमा ७ विकेट गुमाउँदै १ सय ४० रन बनाएको थियो । युएईका बासिल हामिदले ३८ बलमा १ चौका र ४ छक्कासहित सर्वाधिक ५१ रन बनाए । त्यस्तै युवा अलराउन्डर अली नासिरले ३० बलमा ३ चौका र १ छक्कासहित ३२ रन बनाए ।

कमजोर सुरुवात गरेपनि पाँचौं विकेटका लागि बासिल हमिद र अली नासिरले ५६ रनको साझेदारी गर्दै इनिङ उकासेका थिए । नेपालका करण केसीले ४ ओभरमा १९ रन खर्चेर सर्वाधिक ३ विकेट लिए। गुलशन झाले ३ ओभरमा ११ रन खर्चेर २ विकेट लिएका थिए ।