सुर्खेत ( हाम्रो खेलकुद) – नेपाल पुलिस क्लबले सुर्खेतमा जारी ३४ औं राष्ट्रिय भलिबल प्रतियोगितामा लुम्बिनी प्रदेशलाई सोझो सेटमा पराजित गर्दै विजयी सुरुवात गरेको छ । शनिबार बिहान सुर्खेतको विरेन्द्रनगरमा भएको खुल्लामञ्चको कोर्ट सम्पन्न खेलमा पुलिसले २५-१४, २५-१७ र २५-२१ ले जित हात पार्यो ।

पहिलो सेटमा लुम्बिनी एक समय ५-६ को प्रतिस्पर्धात्मक अवस्थामा थियो । त्यसपछि पुलिसले पहिलो सेट २५-१४ ले सहज जित हात पारेको थियो ।

दोस्रो सेटको सुरुवाती समय लुम्बिनीले राम्रो अग्रता लिएपनि त्यसलाई निरन्तरता दिन भने सकेन । लुम्बिनी एक समय सुरुवाती चरणमा ८-३ को बलियो अग्रता लिएको थियो । जुन अवस्थामा पुलिसले टाइम आउट लिनु परेको थियो ।

उक्त टाइम आटपछि उत्कृष्ट पूनरागमन गर्दै ११-११ बराबरी गर्दै भेटाएको थियो । त्यसपछि पुलिसले २५-१७ ले सहज जित हात पारेको थियो ।

तेस्रो सेटमा लुम्बिनी एक समय १८-१२ ले पछि थियो । सेटमा राम्रो पूनरागमन गरेपनि जित हात पार्न सकेन ।
आजको दोस्रो खेलमा कर्णाली प्रदेश र मधेश प्रदेशबीच जारी छ ।

पहिलो खेलमा मधेशले सुदूरलाई हराएको थियो । कर्णालीले आर्मीसँग हारेको थियो । तेस्रो खेलमा आज कोशी र बागमतीबीच दिउँसो साढे १२ बजे खेल हुनेछ । दिनको अन्तिम खेल दिउँसो २ : ३० मा गण्डकी र सुदूरपश्चिमबीच प्रतिस्पर्धा हुनेछ ।

समूह ए मा पुलिस, एपीएफ, लुम्बिनी, बागमती र कोशी छन् । समूह बी मा आर्मी, गण्डकी, कर्णाली, सुदूरपश्चिम र मधेश छन् । प्रतियोगितामा हरेक समूहका शीर्ष दुई टोलीले सेमिफाइनल खेल्नेछन् । नेपाल भलिबल संघको आयोजनामा उक्त प्रतियोगिता पुष २६ सम्म सुर्खेतमा चल्नेछ ।