सुर्खेत (हाम्रो खेलकुद)- साविक विजेता एपिएफ र त्रिभुवन आर्मी क्लब सुर्खेतमा जारी ३४ औं राष्ट्रिय पुरुष भलिबल प्रतियोगितामामा आ आफ्नो समूहको विजेता बनेका छन् ।

वीरेन्द्रनगरको खुलामञ्चको कोर्टमा मंगलबार समूह ‘ए’ मा एपिएफले बागमती प्रदेशलाई‌ र समूह ‘बी’ आर्मीले मधेशलाई समान ३-० ले हराउँदै आफ्नो समूहका विजेता हुन् । प्रतियोगिताका‌ अपराजित यी दुई टोली सोमबार नै सेमिफाइनल पुगिसकेका थिए।

दिनको पहिलो खेलमा एपिएफले बागमतीलाई २५-७,२५-१८ र २५-१३ ले हराएको थियो। दिनको दोस्रो खेलमा आर्मीले मधेशलाई २५-२०, २५-१९ र २५-१४ ले पराजित गरेको थियो। एपिएफ र आर्मी दुबै टोली आजको खेलमा आफ्नो पहिलो रोजाइका खेलाडीलाई‌ आराम दिएको‌ थियो।

लिगका सबै ४ खेल हार्नेमा बागमती एक्लो टोली रह्यो । एपिएफ, नेपाल पुलिस क्लब, कोशी प्रदेश र लुम्बिनी प्रदेश कुनै पनि टोली विरुद्ध बागमतीले एक‌ सेट पनि जित्न सकेन । समूह ‘ए’ मा पुलिस अन्तिम खेल अघि नै सेमिफाइनल पुगेको छ । पुलिसले आज हुने तेस्रो खेलमा कोशीको‌ सामना गर्ने छ।

समूह ‘बी’ बाट सेमिफाइनल पुग्ने दोस्रो टोलीको निर्णय आज हुने गण्डकी प्रदेश र घरेलु टोली कर्णालीको‌ खेलपछि टुंगो लाग्ने छ। यसअघि ३ खेलमा गण्डकीले २ खेल र कर्णालीले १ खेल जितेको थियो। कर्णालीले सोझो सेटले जित्ने बाहेक सबै खाले नतिजाले गण्डकी सेमिफाइनल पुग्नेछ।

नेपाल भलिबल संघको आयोजना र कर्णाली प्रदेश भलिबल संघको व्यवस्थापनमा भइरहेको प्रतियोगिताको फाइनल पुस २६ गते हुनेछ ।