काठमाडौं (हाम्रो खेलकुद) – चौथो टाइगर कप अन्तर्गत समूह बी को पहिलो खेलमा चन्द्रागिरि नगरपालिका न्यु डायमन्डले त्रिभुवन आर्मी क्लबलाई पराजित गरेको छ ।

पोखरा रंगशालामा भएको दिनको दोस्रो खेलमा न्यु डायमन्डले ३-१ को जित दर्ता गर्दै समूहमा ३ अंक जोडेको छ । रिमा कुँवरसँगै कप्तान प्रतिभा माली र युवा स्पाइकर सलिना बुढा मगरले उच्च प्रदर्शन गर्दा डायमन्डको जित सम्भव भएको थियो ।

डायमन्डले पहिलो सेट २५-२० ले आफ्नो पक्षमा पारेको थियो । दोस्रो सेटमा पनि आर्मीलाई दबाबमा राख्दै डायमन्ड २५-१७ ले विजयी भयो ।

तेस्रो सेटमा आर्मीले सुरुवातदेखि अग्रता बनाउँदै पुनरागमनको प्रयास गर्यो । एक समय ६ अंकले अघि रहेको आर्मीलाई डायमन्डले अन्त्यतिर चुनौती दियो । तर आर्मी २५-२३ ले तेस्रो सेट जित्दै खेलमा फर्कन सफल भयो ।

चौथो सेटमा न्यु डायमन्डले अन्त्यतिर एकपक्षीय प्रदर्शन गर्दै जित पक्का गर्यो । एक समय ९-९ को स्थितिमा रहेको खेल डायमन्डले २५-१५ को जित निकाल्दै विजयी सुरुवात पक्का गर्यो ।

त्यसअघि समूह ए तर्फ भएको दिनको पहिलो खेलमा नेपाल एपिएफ क्लबले नेपाल पुलिस क्लबलाई पाँचौ सेटमा पराजित गरेको थियो ।

सुरुवाती दुई सेटमा जितेर बलियो स्थितिमा पुगेको एपिएफले त्यसपछि लगातार दुई सेट गुमाउँदा खेल पाँचौ सेटमा पुगेको थियो । तर पाँचौ सेटमा १५-१३ को अन्तरमा जित हासिल गर्दै एपिएफले २ अंक जोड्दा पराजित पुलिसले १ अंक प्राप्त गर्यो ।

पहिलो सेट एपिएफले २५-१८ ले जितेको थियो । एपिएफले २५-१८ कै अन्तरमा दोस्रो सेट पनि आफ्नो पक्षमा पार्यो ।

तेस्रो सेटमा भने पुलिसले सुरुवातदेखि अग्रता लिँदै २५-१९ को जितका साथ खेलमा फर्कियो । चौथो सेटमा पनि पुलिसले तेस्रो सेटको लयलाई कायम राख्दै २५-१८ को जित हासिल गर्यो ।

अब पुरुषतर्फ दिउँसो १२:३० बजे एपिएफ र पुलिस खेल्दा अन्तिम खेलमा गण्डकी प्रदेश र त्रिभुवन आर्मी क्लबबीच प्रतिस्पर्धा हुनेछ ।

महिलातर्फ समूह एमा एपिएफ र पुलिसका साथ घरेलु टोली गण्डकी प्रदेश तथा समूह बी मा त्रिभुवन आर्मी क्लब, चन्द्रागिरी नगरपालिका न्यु डायमण्ड महिला टिम र भारतीय हरियाणा टिम छन् ।

पुरुषतर्फ सविक विजेता घरेलु टोली गण्डकी, पूर्व विजेता आर्मी र हेल्प नेपाल स्पोर्टस क्लब समूह ए तथा एपिएफ, पुलिस र श्रीलंका आर्मी टिम समूह बी मा छन् ।

समूह विजेता र उपविजेताले सेमिफाइनलमा स्थान पक्का गर्नेछन् । लिग कम नकआउट र सेमिफाइनलमा हरेक दिन ४-४ खेल हुनेछन् । तेस्रो स्थान र फाइनलको दिन भने २-२ खेल हुनेछ ।

महिला र पुरुष दुवै तर्फको विजेता टोलीले समान ५ लाख ५५ हजार ५ सय ५५, दोस्रो हुनेले २ लाख ५५ हजार ५ सय ५५ तथा तेस्रो हुनेले १ लाख २५ हजार ५ सय ५५ रुपैयाँ प्राप्त गर्नेछन् ।