काठमाडौं (हाम्रो खेलकुद) – पोखरामा जारी चौथो टाइगर कप अन्तर्गत विहीबार महिलातर्फ सेमिफाइनल खेल र पुरुषतर्फ समूह ए को अन्तिम खेल हुने भएको छ ।

समय अभावका कारण प्रतियोगिताको पहिलो दिन स्थगित भएको गण्डकी प्रदेश र त्रिभुवन आर्मी क्लबको खेल आज सुरुवातदेखि खेलाइने भएको छ । उक्त खेलको विजेताले सेमिफाइनलमा स्थान पक्का गर्ने भएकाले पनि कडा प्रतिस्पर्धा हुने आँकलन गरिएको छ । यद्यपि खेलको नतिजा र अंक अनुसार समूह विजेता र उपविजेता छिनोफानो हुनेछ ।

पुरुषतर्फ समूह बी बाट एपिएफ समूह विजेता र श्रीलंका आर्मी उपविजेता बनिसकेका छन् । यस्तै समूह ए कै हेल्प नेपाल स्पोर्ट्स क्लब पनि सेमिफाइनलमा पुग्ने पक्का भइसकेको छ ।

महिलातर्फ भने पहिलो सेमिफाइनलमा समूह ए को विजेता नेपाल एपिएफ क्लबले समूह बी उपविजेता त्रिभुवन आर्मी क्लबसँग खेल्दैछ । त्यस्तै अर्को सेमिफाइनलमा समूह बी को शीर्षस्थानमा रहेर अघि बढेको चन्द्रागिरी नगरपालिका न्यु डायमन्डले नेपाल पुलिस क्लबको सामना गर्नेछ । विदेशी खेलाडी सम्मिलित गण्डकी प्रदेश र भारतको हरियाणा टोली समूह चरणबाट नै बाहिरिए ।

प्रतियोगिता अन्तर्गत शुक्रबार महिलातर्फ तेस्रो खेल र पुरुषतर्फका सेमिफाइनल खेलहरु हुने तालिका रहेको छ । यस्तै प्रतियोगिताको अन्तिम दिन पुरुष र महिलाको फाइनलसँगै पुरुषको तेस्रो स्थानको खेल पनि हुनेछ ।

महिला र पुरुष दुवै तर्फको विजेता टोलीले समान ५ लाख ५५ हजार ५ सय ५५, दोस्रो हुनेले २ लाख ५५ हजार ५ सय ५५ तथा तेस्रो हुनेले १ लाख २५ हजार ५ सय ५५ रुपैयाँ प्राप्त गर्नेछन् ।