काठमाडौं (हाम्रो खेलकुद) – मधेश प्रदेशले जारी प्रधानमन्त्री कप पुरुष क्रिकेट प्रतियोगितामा जित सहित लिग चरण टुंगाएको छ । आफ्नो अन्तिम खेलमा लुम्बिनी प्रदेश माथि ९ रनको जित निकाल्दै मधेशले सुखद अन्त्य गरेको हो ।  

मूलपानीमा मधेश प्रदेशले दिएको १७० रनको मध्यम लक्ष्य पछ्याएको लुम्बिनी प्रदेश ४०.५ ओभरमा १६० रनमा समेटियो । मधेशको जितमा प्रदीप पासवान एक्लैले ६ विकेट लिए । उनले ९ ओभर बलिङ गरेर ३० रन खर्चिए ६ विकेट लिएका हुन् ।

यस्तै अभिषेक तिवारीले २ विकेट लिए भने रुपेश सिंह र हरिशंकर शाहले समान एक एक विकेट लिए ।

लुम्बिनीका लागि प्रज्वल थापाले ७९ बलमा ४ चौका र ३ छक्का सहित ६२ रनको अर्धशतकीय इनिङ खेले । यस्तै अभिषेक गौतमले २६ रन बनाए भने दिलसाद अलिले २२ र म्रिनाल गुरुङले २१ रन बनाए ।

यसअघि टस हारेर पहिले ब्याटिङ गरेको मधेश ४१.३ ओभरमा १६९ मा समेटिन पुग्यो । मधेसका लागि अरनिको यादवले सर्वाधिक ३८ रन बनाएका थिए । यस्तै पावन सर्राफ र अभिषेक तिवारीले समान २६-२६ रन बनाउँदा मयन यादवले २२ रन बनाए ।

लुम्बिनीका लागि वीर मगरले ४ विकेट लिए । उनले ८.३ ओभरमा ३४ रन खर्चेर ४ विकेट लिएका हुन् । यस्तै अभिषेक गौतमले ३ तथा निर्मल गुरुङ, मोहम्मद हुसेन र कृष्ण कार्कीले समान एक एक विकेट लिए ।