एजेन्सी – स्पेनिस ला लिगाको शीर्षस्थानमा रहेको रियल म्याड्रिड र बार्सिलोनाले सफलता हात पारेका छन् । रियलले घरेलु टोली मलोर्कालाई १–० ले पराजित गर्दै उपाधि यात्रालाई थप मजवुत बनाएको छ ।

रियलको जितमा दोस्रो हाफमा ओरेलिएन चुआमेनीले गरेको गोल नै निर्णायक बन्यो । मलोर्कामा शनिबार राति भएको खेलमा रियलले घरेलु टोलीलाई दवावमा राखेपनि गोलको लागि दोस्रो हाफ नै कुर्नुपरेको थियो ।

चुआमेनीले ४८औं मिनेटमा झन्डै ३० यार्डबाट गरेको प्रहार विपक्षी खेलाडीलाई लाग्दै जाली चुम्न पुग्दा मलोर्काका गोलरक्षकले रोक्ने कुनै मौका नै पाएन ।

यस जितसँगै शीर्षस्थानमा रहेको रियलको ३१ खेलबाट ७८ अंक पुगेको छ । रियलले दोस्रो स्थानमा रहेको बार्सिलोनालाई ८ अंकले पछि पारेको छ । पराजित मलोर्का ३१ अंकसहित १५औं स्थानमा छ ।

ला लिगाकै अर्काे खेलमा बार्सिलोनाले क्याडिजलाई १–० ले पराजित गरेको छ । बार्सिलोनाको जितमा ३७औं मिनेटमा जोआओ फेलिक्सले गरेको गोल नै निर्णायक बन्यो ।

यस जितले बार्सिलोनाले शीर्षस्थानको रियलसँगको अंक दुरी ८ मै राखेको छ । बार्सिलोनाको ३१ खेलबाट ७० अंक छ । पराजित क्याडिज ३१ खेलबाट २५ अंक जोडेर रेलिगेसन जोनको १८औं स्थानमा छ ।