काठमाडौं (हाम्रो खेलकुद) – मिडल ब्लकर सुमित्रा रेग्मी र स्पाइकर आरती सुवेदीले नेपाली महिला राष्ट्रिय भलिबल टोलीबाट डेब्यू गरेका छन् ।

बिहीवार सुरु भएको काभा नेसन्स लिगको उद्घाटन खेलमा श्रीलंकाविरुद्ध खेल्दै सुमित्रा र आरतीले डेब्यू गरेका हुन् । सुमित्राले पहिलाे सेटमा पहिलाे राेजाईमै तथा आरतीले तेस्राे सेटमा निरुता ठगुन्नाको स्थानमा कोर्टमा प्रवेश गरेकी हुन् ।

यसअघि रसियासँगको भएको पहिलो मैत्रीपूर्ण खेलका क्रममा सुमित्रा र आरतीले खेलेका थिए । यद्दपी त्यो अन्तर्राष्ट्रिय प्रतियोगिता थिएन ।

सुमित्राले दुई वर्षअघि मात्र न्यु डायमन्डबाट आधारभूत भलिबल प्रशिक्षण लिएर करिअर सुरु गरेकी थिइन् । छोटो अवधिमै घरेलु भलिबलमा प्रभाव छोड्न सफल उनी यसपटक टोलीमा सुरुवात गर्ने दाबेदारी प्रस्तुत गरेकी छिन् ।

आरतीका लागि भने ५ वर्षपछि राष्ट्रिय टोलीको ढोका खुलेको हो । सन् २०१९ मा भएको १३ औं दक्षिण एसियाली खेलकुद (साग) कै समयमा बन्द प्रशिक्षणमा परेकी उनी अन्तिम टोलीमा समावेश भएकी थिइनन् ।

त्यसयता केही समय मोफसलकै क्लबमा बिताएकी उनले ३ वर्ष एपिएफबाट खेलिन् । गत वर्ष आर्मीमा भर्ती भएकी उनले त्यहाँ पुगेयता भने खेलमा सुधार गर्दै राष्ट्रिय टोलीको यात्रा तय गरेकी हुन् ।

नेपालसहित ५ राष्ट्र सहभागी हुने प्रतियोगिता साउन २३ गतेसम्म दशरथ रंगशालास्थित कभर्ड हलमा चल्नेछ । नेपालसहित प्रतियोगितामा भारत, इरान, श्रीलंका र माल्दिभ्स रहेका छन्।