काठमाडौं (हाम्रो खेलकुद)- केबी साम नेपाल कबड्डी लिग (एनकेएल) मा विराटनगर ब्यान्डिन्ट्सले अत्यन्त रोमाञ्चक खेलमा काठमाडौं माभरिक्सलाई ४४-४३ को झिनो अन्तरमा हरायो।

विराटनगर लगातार दोस्रो जित दर्ज गर्न सफल भयो।
राष्ट्रिय खेलकुद परिषदको कभर्ड हलमा आज भएको पहिलो खेलमा विराटनगरले उत्कृष्ट सुरूवात गर्यो। ६-२ को अग्रता रहँदा पहिलो पटक अल आउट गर्दै १०-२ को अग्रता बनायो।

यसपछि दोस्रो अल आउट १६- ४ मा गर्यो र थप स्कोर गर्यो। आरामदायी अग्रता बनाउने क्रममा २२- ५ ले विराटनगर अगाडि थियो। तर यसपपछि काठमाडौंका कप्तान तथा मार्की घनश्याम रोक्का मगरको सानदार प्रदर्शनमा काठमाडौं लगातार १० स्कोर गर्न सफल भयो।

घनश्यामको सुपर रेडमा काठमाडौंले ३ स्कोर गर्यो। लगतै उनले अर्को स्कोर गरे। यसपछि काठमाडौं विराटनगरलाई अल आउट गर्न पनि सफल रहयो।
यही क्रममा घनश्यामले अर्को सुपर रेडमा टिमलाई थप तीन अंक दिलाए। यो सँगै पहिलो हाफ २६-१९ को स्कोरमा सकियो।

दोस्रो हाफ प्रतिस्पर्धात्मक बन्यो। दोस्रो हाफको सुरूवात गर्दा काठमाडौंका घनश्याम कोर्टमा थिएनन्। यसको फाइदा उठाउँदै विराटनगरले अग्रतालाई जोगाइ नै रहयो।

तर खेलको ९ मिनेट बाकी छँदा घनश्याम कोर्ट प्रवेश गरेसँगै काठमाडौंको खेल उनमै निर्भर रहयो। उनले नै विराटनगरलाई अल आउट गर्दा खेल ३६-३३ मा पुग्यो। काठमाडौंले अग्रता तीन अंकमा झार्यो। अन्तिम ५२ सेकेन्डको खेल बाकी छँदा घनश्यामले दुई अंक जोड्दा खेल ४१-४१ को बराबरीमा पुग्यो।

सानदार कमब्याक गरेपनि २२ सेकेन्ड बाकी छँदा विराटनगरका नोफादोन पोन्टाइसङ एक्लै बाकी थिए। यो अवस्थामा उनले सुपर रेडबाट तीन स्कोर गर्दा विराटनगरलाई ४४-४२ मा पुर्याउँदै रोमाञ्चक शैलीमा टिमलाई जिततर्फ डोर्याए।

अन्त्यमा रेफ्रीले विराटनगरको एक अंक काटिदिए। तर पनि ४४-४३ को जितमा विराटनगरले ५ अंक जोड्यो।

यो खेलमा भारतीय प्रो कवड्डी लिग खेलेका काठमाडौंका घनश्यामले सर्वाधिक २८ स्कोर गरे। तर पनि टिमलाई जित दिलाउन सकेनन्। उनले टचबाट २३ र बोनसबाट ५ स्कोर गरे। विराटनगरको लागि नोफादोन पोन्टाइसङले टचबाट १४ र बोनसबाट ९ गरी कुल २३ स्कोर गरेका थिए।

विराटनगरले रेडबाट २८, ट्याकलबाट १२ रअल आउटबाट ४ स्कोर गर्यो। काठमाडौंले भने रेडबाट सर्वाधिक ३६ स्कोर गर्दा ट्याकलबाट ३ र अल आउटबाट ४ स्कोर गरेको थियो।

लगातारको दोस्रो जितमा विराटनगरले १० अंक बनायो। उसले हिको धनगढी वाइल्ड कमयाट्सलाई हराएको थियो। काठमाडौंको यो पहिलो हार हो। यसअयपहिलो खेलमा काठमाडौंले पोखरा लेकर्सलाई हराएको थियो। काठमाडौंले दुई खेलबाट ६ अंक बनाएको छ।