काठमाडौं(हाम्रो खेलकुद) – नेपाल पुलिस क्लबले एनसेल पाँचौ टाइगर कप भलिबलको पुरुषतर्फ भारतीय क्लबलाई पराजित गरेको छ ।

पोखरा रंगशालास्थित भलिबल कोर्टमा आइतवारको तेस्रो खेलमा पुलिसले भारतको सुनिल भलिबल क्लबलाई ३-१ को सेटमा पराजित गरेको छ ।

पुलिसले पहिलो २५-१०र दोस्रो सेट २५-१३ ले जितेको थियो । तर, तेस्रो सेटमा भारतीय क्लबले पुनरागमनको गर्यो । तेस्रो सेट भारतीय क्लबले २५-२२ ले जितेकोमा चौथो सेट पुलिसले २५-२२ ले जित्दै खेल जित्यो ।

पुलिसको यो लगातार दोस्रो जित हो । भारतीय क्लबको भने यो पहिलो हार हो । आजै भएको पहिलो खेलमा एपिएफले प्रतियोगितामा लगातार दोस्रो जित हासिल गरेको थियो । एपिएफले न्यु डायमण्डलाई ३-० को साझो सेटमा पराजित गरेको थियो ।

दोस्रो खेलमा भने पुलिसको महिला टोलीले थाइल्याण्डको क्लबमाथि ३-१ को सेटमा जित हात पारेको थियो । आजबाट प्रतियोगितामा लिग चरणका खेलहरु सुरु भएको छ ।

सबै टोलीले एकएक खेल खेलेपछि अहिले जित्ने र हार्ने टोलीको छुट्टाछुट्टै समूह बनेका छन् । ती समूहअन्तर्गत लिग खेल हुनेछ । एउटै समूहमा रहने टोलीले एकअर्कासँग खेल्नेछन् ।

आजको अन्तिम तथा चौथो खेल पुरुषतर्फ हार्ने समूहका गण्डकी प्रदेश र टिपटप हेल्प नेपाल स्पोटर्स क्लबबिच हुनेछ ।

लिगपछि जित्ने समूहबाट शीर्ष दुई टोली फाइलन प्रवेशका लागि पहिलो क्वालिफायर खेल्नेछन् । तेस्रो स्थानमा रहने र हार्ने समूहबाट शीर्ष स्थानमा रहने टोलीले एलिमिनेटरमा भिड्नेछन् ।

पहिलो क्वालिफायरमा पराजित हुने टोली र एलिमिनेटरमा विजेता हुने टोलीले दोस्रो क्वालिफायर खेल्नेछ । हार्ने समूहबाट दोस्रो र तेस्रो स्थानमा रहने टोली प्रतियोगिताबाट बाहिरिनेछन् । टाइगर ग्रुप अफ पोखराको आयोजनामा भएको प्रतियोगिता माघ १९ गतेसम्म चल्नेछ ।