काठमाडौं(हाम्रो खेलकुद) – एनसेल पाँचौ टाइगर कप भलिबलको पुरुषतर्फ टिप टप हेल्प नेपाल र गण्डकी प्रदेशबीचको खेल स्थगित भएको छ ।

पोखरा रंगशालास्थित भलिबल कोर्टमा सोमवारको चौथो तथा अन्तिम खेल खराब प्रकाशका कारणबिचमै रोकिएको हो । रोकिएको खेल मंगलवार सुरुबाटै हुनेछ ।

हेल्प नेपालले पहिलो सेट २५–२२ र दोस्रो सेट २७–२५ ले आफ्नो पक्षमा पारेको थियो । तेस्रो सेटमा पुनरागमन गर्दै गण्डकीले २७–२५ को जित निकालेको थियो । त्यसपछि खेल स्थगित भएको हो ।

आजै भएको पहिलो खेलमा एपिएफले प्रतियोगितामा लगातार दोस्रो जित हासिल गरेको थियो । महिला तर्फको खेलमा एपिएफले न्यु डायमण्डलाई ३-० को साझो सेटमा पराजित गरेको थियो ।

दोस्रो खेलमा भने पुलिसको महिला टोलीले थाइल्याण्डको क्लबमाथि ३-१ को सेटमा जित हात पारेको थियो ।

आजैको तेस्रो पुलिसको पुरुष टोलीले भारतीय क्लबलाई पराजित गरेको थियो । आजबाट प्रतियोगितामा लिग चरणका खेलहरु सुरु भएको हो ।

सबै टोलीले एकएक खेल खेलेपछि अहिले जित्ने र हार्ने टोलीको छुट्टाछुट्टै समूह बनेका छन् । ती समूहअन्तर्गत लिग खेल हुनेछ । एउटै समूहमा रहने टोलीले एकअर्कासँग खेल्नेछन् ।

आजको अन्तिम तथा चौथो खेल पुरुषतर्फ हार्ने समूहका गण्डकी प्रदेश र टिपटप हेल्प नेपाल स्पोटर्स क्लबबिच हुनेछ ।

लिगपछि जित्ने समूहबाट शीर्ष दुई टोली फाइलन प्रवेशका लागि पहिलो क्वालिफायर खेल्नेछन् । तेस्रो स्थानमा रहने र हार्ने समूहबाट शीर्ष स्थानमा रहने टोलीले एलिमिनेटरमा भिड्नेछन् ।

पहिलो क्वालिफायरमा पराजित हुने टोली र एलिमिनेटरमा विजेता हुने टोलीले दोस्रो क्वालिफायर खेल्नेछ । हार्ने समूहबाट दोस्रो र तेस्रो स्थानमा रहने टोली प्रतियोगिताबाट बाहिरिनेछन् । टाइगर ग्रुप अफ पोखराको आयोजनामा भएको प्रतियोगिता माघ १९ गतेसम्म चल्नेछ ।