काठमाडौं(हाम्रो खेलकुद) – टिप टप न्यु डायमण्ड विभागिय टोली नेपाल पुलिस क्लबलाई पराजित गर्दै टाइगर कप भलिबलको दोस्रो क्वालिफायरमा पुगेको छ ।

पोखरा रंगशालास्थित भलिबल कोर्टमा बिहीवार भएको एलिमिनेटर खेलमा पुलिसलाई ३-० को सोझो सेटमा पराजित गरि न्यु डायमण्ड दोस्रो क्वालिफायरमा पुगेको हो ।

न्यु डायमन्डले पहिलो सेट २५-२२, दोस्रो सेट २५-१४ र तेस्रो सेट २५-२१ ले आफ्नो पक्षमा पार्यो । यसअघि न्यू डायमण्डले लिग चरणमा पनि पुलिसलाई पराजित गरेको थियो ।

पुलिस ‘हार्ने समूह’ बाट शीर्ष स्थान र न्यु डायमण्ड ‘जित्ने समूह’ बाट तेस्रो स्थानमा रहँदै एलिमिनेटरमा प्रवेश गरेका थिए ।

न्यु डायमण्डले अब फाइनल प्रवेशका लागि एपिएफ क्लब र आयोजक टाइगर ग्रुपबिचको खेलमा पराजित हुने टोलीसँग प्रतिष्पर्धा गर्नेछ ।

आजको दोस्रो खेल पुरुषतर्फ त्रिभुवन आर्मी क्लब र भारतको सुनिल भलिबल क्लबको बिच हुनेछ । उक्त खेल समय अभावका कारण बुधवार स्थगित भएको थियो । यो खेलवाट क्वालिफायर खेल्ने र एलिमिनेटर खेल्ने टोलीको टुंगो लगाउनेछ ।

आजको तेस्रो खेल गण्डकी प्रदेश र टिपटप हेल्प नेपाल स्पोर्ट्स क्लबबिच हुनेछ । त्यो खेलको विजेताले एलिमिनेटर खेल्नेछ । टाइगर ग्रुप अफ पोखरा नेपालको आयोजनामा भइरहेको प्रतियोगिता माघ २० गतेसम्म चल्नेछ ।