पोखरा (हाम्रो खेलकुद)- नेपाल पुलिस क्लबका पहल गहतराज र आयोजक टाइगर ग्रुप अफ पोखराकीअम्फा सोमसुरात एनसेल पाँचौं टाइगर कप भलिबल प्रतियोगिताको सर्वाेत्कृष्ट खेलाडी बनेका छन् ।

आफ्नो टोलीलाई उपाधि जिताउन महत्वपूर्ण भूमिका खेलेका पहल पुरुषतर्फ र महिलातर्फ अम्फा सर्वोत्कृष्ट खेलाडी बनेका हुन् । सर्वोत्कृष्ट बनेका दुवैजनाले ट्रफीसहित २५ हजार ७ सय ७७ रुपैयाँ प्राप्त गरे ।

महिलातर्फ उत्कृष्ट स्पाइकर एपिएफकी सरस्वती चौधरी, सर्भर एपिएफकै निरुता ठगुन्ना, सेटर टाइगर ग्रुपका अरुणा शाही, ब्लकर टाइगर ग्रुपकै नान्तिकान टुनिपो, लिबिरो न्यू डायमण्डकी सलिना श्रेष्ठ र प्रशिक्षक टाइगर ग्रुपका अर्जुन घिमिरे घोषित भए ।

पुरुषतर्फ उत्कृष्ट स्पाइकर गण्डकीका रमनकुमार, सर्भर गण्डकीकै सञ्जुकुमार शाह, सेटर विवश आलेमगर, ब्लकर पुलिसका रविन नगरकोटी, लिबिरो आर्मीका इश्वर थापा र प्रशिक्षक पुलिसकै चन्द्र कुँवर बने । विधागततर्फ उत्कृष्ट हुनेले ट्रफीसहित १० हजार ५ सय ५५ रुपैयाँ प्राप्त गरे ।
पुलिस पहिलो पटक टाइगर कप भलिबल च्याम्पियन

नेपाल पुलिस क्लबले एनसेल टाइगर कप भलिबल प्रतियोगिताको पुरुषतर्फ पहिलो पटक च्याम्पियन बनेको छ।
पोखरा रंगशालामा भर्खरै सकिएको फाइनल खेलमा गण्डकी प्रदेशलाई ३–१ को सेटले पराजित गर्दै पुलिसले पाँचौं सस्करणको उपाधि जितेको हो ।

पहिलो, दोस्रो र चौथो सेटमा जित निकाल्दै पुलिसले उपाधि जितेको हो । पहिलो सेट २५–२३ र दोस्रो सेट २५–२१ ले जितेको पुलिसले तेस्रो सेट २०–२५ ले गण्डकीलाई सुम्पिएको थियो ।

दोस्रो सेटमा १२–१५ को अग्रतालाई उल्टाउँदै पुलिसले २५–२१ को जित निकालेको थियो । चौथो सेट २५–२२ ले जित निकाल्दै पुलिस उपाधि चुम्न सफल रह्यो ।

त्यसअघि भएको महिलातर्फको फाइनलमा एपिएफ क्लबलाई ३–२ को सेटले पराजित गर्दै आयोजक टोली टाइगर ग्रुपले पहिलो पटक उपाधि जितेको थियो ।
दुवैतर्फ विजेताले ५ लाख ८५ हजार ५ सय ५५ रुपैयाँ तथा दोस्रोले २ लाख ८५ हजार ५ सय ५५ रुपैयाँ प्राप्त गर्यो।