काठमाडौं (हाम्रो खेलकुद)- सूर्य नेपाल एनपिजिए म्याच प्ले रोयल नेपाल गल्फ क्लबमा भोलि सुरु हुँदैछ। सूर्य नेपाल गल्फ टुर अन्तर्गत सिजनको आठ मध्ये यो अलग फरम्याटको प्रतियोगिता हो।

म्याच प्लेमा गत सिजनको अर्डर अफ मेरिटमा पहिलो देखि १६ औं वरियताका खेलाडीले प्रतिस्पर्धा गर्न पाउँछन्। पहिलो दिन पहिलो चरणमा ८ जोडीले एक अर्कासँग क्वाटर फाइनल प्रवेशको लागि प्रतिस्पर्धा गर्नेछन्।

नेपाल नम्बर एक गल्फर भुवन नगरकोटीको सामना १६ औं वरियताका पशुपति शर्माले गर्नेछन्। यो सिजन उपाधि जित्न नसकेका भुवनलाई उत्कृष्ट प्रदर्शन गर्ने चुनौती रहनेछ।

यो सिजन फर्ममा रहेका नेपाल नम्बर २ गल्फर निरज तामाङले १५ औं वरियताका सूर्य प्रसाद शर्मासँग क्वाटर फाईनल प्रवेशको लागि प्रतिस्पर्धा गर्नेछन्।

तेस्रो वरियताका दिनेश प्रजापतिलाई १४ औं वरियताका रमेश अधिकारीले चुनौती दिनेछन्। चौथो वरियताका रवि खड्का र १३ औं वरियताका टंक बहादुर कार्कीबीच अर्को खेल हुनेछ।

यस्तै १२ औं वरियताका प्रदीप कुमार लामाले ५ औं वरियताका सञ्जय लामासँग खेल्नेछन्। छैटौं वरियताका जयराम श्रेष्ठ र ११ औ वरियताका तोरण विक्रम शाही, सातौं वरियताका रामे मगरले १० औं वरियताका दीपक मगर, तथा आठौं वरियताका धन बहादुर थापाले नवौं वरियताका भुवन कुमार रोक्कासँग खेल्ने तालिका रहेको छ।

पहिलो चरणका विजेता क्वाटरफाइनलमा प्रवेश गर्नेछन्। पहिलो चरण, क्वाटरफाइनल, सेमिफाइनल र तेस्रो स्थानको लागि १८ होलको प्रतिस्पर्धा हुनेछ। फाइनल ३६ होलको हुनेछ।

क्वाटरफाइनल र सेमिफाइनल बुधवार तथा फाइनल र तेस्रो स्थानको लागि बिहीवार प्रतिस्पर्धा हुनेछ।

प्रतियोगिताको कुल २ लाख ५० हजार रुपैयाँ पुरस्कार रहेको छ। सहभागी सबै १६ प्रोले नगद पुरस्कार प्राप्त गर्नेछन्।

विताले ६० हजार र दोस्रोले ४२ हजार रुपैयाँ प्राप्त गर्नेछन् । यसैगरी तेस्रोले ३२, चौथो २४ हजार रुपैयाँ पाउनेछन्।

क्वाटरफाइनलमा पराजित हुने ४ खेलाडीले ११ हजार र पहिलो चरणबाट बाहिरिने ८ खेलाडीले समान ६ हजार रुपैयाँ हात पार्नेछन्।