काठमाडौं (हाम्रो खेलकुद)– माल्दिभ्समा आयोजना हुने एभिसी सेन्ट्रल जोन सिनियर भलिबल च्याम्पियनसिपको पहिलो खेलमा नेपालले तुर्केमिनिस्तानसँग खेल्ने भएको छ ।
एसियन भलिबल फेडेरेसनले सार्वजनिक गरेको ‘ड्र’ मा नेपालले पहिलो प्रतिद्धन्द्धीका रुपमा तुर्केमिनिस्तान पाएको हो । नेपालको पहिलो खेल मार्च २३ तारिखमा हुनेछ । यस्तै नेपालले दोस्रो खेलमा २४ मार्चमा आयोजक माल्दिभ्स तथा २७ मार्चमा किर्गिस्तानको सामना गर्नेछ । च्याम्पियनसिप चैत ९ देखी १७ गते सम्म चल्नेछ ।
प्रतियोगितामा नेपालसहित आयोजक माल्दिभ्स, किर्गिस्तान र तुर्केमिनिस्तानले सहभागिता जनाएका छन् । प्रतियोगिताको लागि नेपालले एक महिना अघिबाट सातदोबाटोस्थित भलिबल कोर्टमा प्रशिक्षण गरिरहेको छ । नेपाली टोलीको कप्तानी इम रानाले सम्हाल्नेछन् ।
