काठमाडौं (हाम्रो खेलकुद) – माल्दिभ्समा जारी तेस्रो एभिसी सेन्ट्रल जोन भलिबल प्रतियोगितामा नेपालले राउन रोविन लिगको अन्तिम खेलमा सोमबार कीर्गिस्तानको सामना गर्दैछ । नेपालले पहिलो खेलमा तुर्किमिनिस्तानसंग पराजय बेहोरेको थियो भने दोस्रो खेलमा आयोजक माल्दिभ्सलाई हराएको थियो ।
पहिलो खेलमा नेपाल उपाधिको दाबेदार तुर्केमिनिस्तानसँग २५–२०, २५–१८ र २५–२२ ले पराजित भएको थियो । दोस्रो खेलमा मालेस्थित भलिबल कोर्टमा नेपालले पहिलो सेट २३–२५ ले गुमाएको नेपालले त्यसपछि लगातार तीन सेट जितेको थियो ।
५ अंकका अग्रताको वावजुद नेपालले पहिलो सेट गुमाएको थियो । त्यसपछि नेपालले दोस्रो सेट २९–२७, तेस्रो सेट ३३–३१ र चौथो सेट २५–१९ ले जित्दै सफल नतिजा निकालेको थियो ।
सोमबारको खेलमा पराजित भएपनि नेपालको कास्य पदक जित्ने सम्भावना भने बाँकी नै रहनेछ । राउन्ड रोबिन लिग पछि पुछारका दुई टोलीले कास्य पदकका लागि प्रतिस्पर्धा गर्नेछन् । शीर्ष दुई टोलीबीच फाइनल हुनेछ ।
भुल सुधार –यसअघिको समाचारमा नेपाल र कीर्गिस्तानबीचको खेल सोमबार हुनुपर्नेमा अन्यथा भएकोले सच्चाइको छ ।
