काठमाडौं (हाम्रो खेलकुद)– नेपाली भलिबल टोलीले पहिलो अन्तर्राष्ट्रिय पदक बिहीबार ग्रहण गरेको छ । माल्दिभ्समा बिहीबार सम्पन्न एभिसी सेन्ट्रल जोन भलिबल च्याम्पियनसिपको समापनका अवसरमा नेपालले कांस्य पदक प्राप्त गरेको हो ।

४१ बर्षअघि अन्तर्राष्ट्रिय भलिबल प्रतियोगिता खेल्न सुरु गरेको नेपालले जितेको यो पहिलो अन्तर्राष्ट्रिय पदक हो । नेपाललाई लिग चरण र प्ले अफमा हराउने कीर्गिस्तानै सेन्ट्रल जोन भलिबल च्याम्पियनसिप विजेता बनेको छ । बिहीबार भएको फाइनलमा तुर्किमिनिस्तानलाई ३–१ ले हराउँदै कीर्गिस्तान च्याम्पियन बनेको हो ।

कीर्गिस्तानसँगको ‘प्ले अफ’ मंगलबार ३–० को सेटले गुमाएपछि नेपाल कांस्य पदकमा सिमित भएको थियो । लिग चरणमा भने तुर्किमिनिस्तानले कीर्गिस्तानलाई हराएको थियो ।

सन् १९७६ मा पाकिस्तानमा काइदे आजम च्याम्पियनसिपबाट अन्तर्राष्ट्रिय भलिबलको यात्रा सुरु गरेको नेपालले १९७८, १९८२ र १९८६ मा एसियाली खेलकुदमा भाग लिएको थियो । १९८७ को तेस्रो दक्षिण एसियाली खेलकुद (साग) देखि निरन्तर भाग लिदै आएको नेपालले पुरुष भलिबलमा कुनै पनि पदक जित्न सकेको थिएन । सागमा नेपालको महिला टोलीले भने तीन पदक कास्य पदक जितिसकेको छ ।

नेपाली टोली भोली राती स्वदेश आइपुग्नेछ । बिहान माल्दिभ्सबाट यात्रा सुरु गर्ने टोली दुबईहुँदै काठमाडौं आउने नेपाली टोलीका सहायक प्रशिक्षक जगदिश भट्टले जानकारी दिए ।

नेपाली भलिबल टोली – इम रानामगर (कप्तान), मानबहादुर श्रेष्ठ, धनबहादुर भट्ट, कुलबहादुर थापा, दिल सुनार, महेन्द्र श्रेष्ठ, भैरव बम, हरि अधिकारी, नरेन्द्र गिरी, राजकुमार निरौला, दुर्गाप्रसाद महतो र ईश्वर थापा मगर ।

प्रशिक्षक – वीरेन्द्र चौधरी (मुख्य),जगदिश भट्ट (सहायक)

व्यवस्थापक – डम्बरबहादुर नेपाली

पदक ग्रहण गर्दै नेपाली टोली ।

एभिसी सेन्ट्रल जोन भलिबल च्याम्पियनसिप विजेता कीर्गिस्तान टोली ।