काठमाडौं (हाम्रो खेलकुद)– नेपाल भबिलल संघले पहिलो अन्तर्राष्ट्रिय पदक जितेर स्वदेश फर्कदै गरेको नेपाली भलिबल टोलीलाई भव्य स्वागत गर्ने तयारी गरेको छ । माल्दिभ्समा बिहीबार सम्पन्न एभिसी सेन्ट्रल जोन भलिबल च्याम्पियनसिपमा नेपालले कास्य पदक जितेको थियो ।

‘नेपाली भलिबलको इतिहासमा यो अहिले सम्मकै ठूलो सफलता हो । यसलाई हामीले सेलिब्रेट गर्नुपर्दछ भन्ने ठानेका छौं’ संघका महासचिव जीतेन्द्रबहादुर चन्दले हाम्रो खेलकुद डटकमसँग भने, ‘संघका पदाधिकारी, राजधानीमा रहेका भलिबल क्लब, तीन विभागिय टोलीका खेलाडी र पदाधिकारी सबैलाई हामीले पदक विजेता टोलीसँग खुसीयाली साट्न, उनीहरुको मनोबल बढाउन र स्वागतका लागि विमानस्थल पुग्न आग्रह गरेका छौं । ’

नेपाली टोली आज राती १० बजे त्रिभुवन विमानस्थल ओलर्ने बताइएको छ । बिहान माल्दिभ्सबाट निस्केको टोली दुबई हुँदै राती काठमाडौं आइपुग्नेछ । ४१ बर्षअघि अन्तर्राष्ट्रिय भलिबल प्रतियोगिता खेल्न सुरु गरेको नेपालले जितेको यो पहिलो अन्तर्राष्ट्रिय पदक हो ।

नेपाललाई लिग चरण र प्ले अफमा हराउने कीर्गिस्तानै सेन्ट्रल जोन भलिबल च्याम्पियनसिप विजेता बनेको छ । बिहीबार भएको फाइनलमा तुर्किमिनिस्तानलाई ३–१ ले हराउँदै कीर्गिस्तान च्याम्पियन बनेको हो । सबै तीन खेल हारेको आयोजक माल्दिभ्स लिग चरणबाटै बाहिरिएको थियो ।

कीर्गिस्तानसँगको ‘प्ले अफ’ मंगलबार ३–० को सेटले गुमाएपछि नेपाल कांस्य पदकमा सिमित भएको थियो । लिग चरणमा भने तुर्किमिनिस्तानले कीर्गिस्तानलाई हराएको थियो ।

सन् १९७६ मा पाकिस्तानमा काइदे आजम च्याम्पियनसिपबाट अन्तर्राष्ट्रिय भलिबलको यात्रा सुरु गरेको नेपालले १९७८, १९८२ र १९८६ मा एसियाली खेलकुदमा भाग लिएको थियो । १९८७ को तेस्रो दक्षिण एसियाली खेलकुद (साग) देखि निरन्तर भाग लिदै आएको नेपालले पुरुष भलिबलमा कुनै पनि पदक जित्न सकेको थिएन । सागमा नेपालको महिला टोलीले भने तीन पदक कास्य पदक जितिसकेको छ ।

पदक विजेता नेपाली भलिबल टोली – इम रानामगर ९कप्तान०, मानबहादुर श्रेष्ठ, धनबहादुर भट्ट, कुलबहादुर थापा, दिल सुनार, महेन्द्र श्रेष्ठ, भैरव बम, हरि अधिकारी, नरेन्द्र गिरी, राजकुमार निरौला, दुर्गाप्रसाद महतो र ईश्वर थापा मगर ।

प्रशिक्षक – वीरेन्द्र चौधरी (मुख्य),जगदिश भट्ट (सहायक)

व्यवस्थापक – डम्बरबहादुर नेपाली