सरस्वतीविरुद्ध रुस्लान थ्री स्टार अग्रतामा

काठमाडौं (हाम्रो खेलकुद) – एक गोलले पछाडी पारेको स्थितिलाई उल्टाउँदै रुस्लान थ्री स्टारले पल्सर सहिद स्मारक ए डिभिजन लिग अन्तर्गत पहिलो हाफमा सरस्वतीविरुद्ध २-१ को अग्रता लिएको छ ।

सरस्वतीले तेस्रो मिनेटमा नै पेनाल्टीमार्फत अग्रता लिएको थियो । फ्रान्सिस ओनेमाको प्रहार पेनाल्टी क्षेत्रभित्र पिटर सगुनको हातमा लाग्दा रेफ्रीले पेनाल्टी दिएका थिए । भिक्टर अमोबीले पेनाल्टीलाई गोलमा परिणत गर्दै १-० को अग्रता दिलाए ।

थ्री स्टारले १६ औं मिनेटमा नै गोल फर्कायो । अनिल गुरुङको प्रहार सरस्वतीको डिफेन्डरको हातमा लागेपछि थ्री स्टारले बराबरीको मौका पाएको थियो । रञ्‍जित धिमालले पेनाल्टीलाई गोलमा परिणत गर्दै खेल बराबरीमा ल्याए ।

२८ अौं मिनेटमा मनीष थापाले झण्डै ३० यार्डमा टाढाबाट गरेको प्रहार क्रसबारको माथिल्लो भागमा लागेर बाहिरिँदा सरस्वती अभागी सावित भयो । ३५ अौं मिनेटमा थ्री स्टारले अग्रता लियो । रन्जन विष्टले दायाँ विङबाट दिएको लो क्रसमा निराजन खड्काले ६ यार्ड बक्सभित्र डाइभिङ हेडरमा गोल गरे ।

यस खेलमा जित हात पारेको खण्डमा थ्री स्टार अंक तालिकाको तेस्रो स्थानमा हुनेछ । सरस्वतीले भने लगातार दोस्रो हार टार्न दोस्रो हाफमा गोल फर्काउनु पर्नेछ ।