काठमाडौं (हाम्रो खेलकुद)- ‘ओलम्पिक डे’ को अवसरमा आयोजना भएको ललितपुर प्याट्रिएट्स स्क्वास च्याम्पियनसिपमा दिदी कृष्णा थापामगर र भाई अमृत थापामगर च्याम्पियन बनेका छन् । कृष्णा महिलामा तथा अमृत पुरुषमा पहिला भएका हुन् ।

सातदोबाटोस्थित स्क्वास कोर्टमा शनिबार भएको फाइनलमा च्याम्पियन बनेका दिदी भाई दुवैले अर्का दिदीभाई भावना सुुनुवार र आकास सुनुवारलाई पराजित गर्दै च्याम्पियन बनेका हुन् ।
पुरुषतर्फको फाइनलमा अमृतले आकासमाथि ३–० को सहज जित निकाल्यो ।

पहिलो सेट ११–४ र दोस्रो सेट ११–२ ले जितेको अमृतले तेस्रो सेट जित्न संघर्ष गर्नुपरेको थियो । पुरुषमा अमिर ब्लोनले तेस्रो स्थान हात पारे । महिलामा कृष्णाले भावना सुनुवारलाई ३–१ को सेटमा हराईन् ।

कृष्णाले पहिलो सेट ७–११ ले गुमाएपनि त्यसपछिको तीनै सेट आफ्नो पक्षमा पार्न सफल भएकी थिइन् । दोस्रो सेटमा कृष्णा ११–५, तेस्रो सेट ११–५ र चौथो सेट ११–४ ले जित्न सफल भएको थियो । कृष्णाले भावनालाई गत चैत/बैशाखमा आयोजना भएको आठौं राष्ट्रिय खेलकुदमा पनि पराजित गरेकी थिइन् ।

महिलामा विपना ब्लोन र स्वस्थानी श्रेष्ठ तेस्रो भइन् । प्लेट च्याम्पियसिपतर्फ महेन्द महर्जनले सुभेन्द्र जोशीलाई ३–० ले हरायो । यु–१७ ब्वाइजमा गोपाल थापाले रोहन नेपालीलाई ११–७ र ११–१ ले पराजित गर्दै उपाधि जिते ।