काठमाडौं (हाम्रो खेलकुद) – रत्ननगर तेक्वान्दो डोजाङ, सरित सौराहा, न्यू स्टार र सौराह डोजाङको संयुक्त आयोजनामा यहि कार्तिक १ र २ गते रत्ननगर नगरपालिकामा तेस्रो राष्ट्रिय अोपन मैत्रीपूर्ण तेक्वान्दो च्याम्पियनसिप हुँदैछ।

प्रतियोगिता संचालन गर्नका लागि अमेरिकाको पोर्टल्यान्डमा रहेको अन्तर्राष्ट्रिय ओपन फ्रेन्डसिप तेक्वान्दो च्याम्पियनसिप (आईअोएफटिसी) र ललितपुरको मैत्री तेक्बान्दो डोजाङले सहयोग र सहकार्य गरेको छ । प्रतियोगितामा पुरुषको २४ र महिलाको २२ गरि कुल ४६ तौल समुहमा प्रतिस्पर्धा हुने छ । साधै पुम्सेतर्फ पुरुषको ५ र महिलाको ४ गरि ९ विधामा प्रतिस्पर्धा हने छ । ६५ स्वर्ण, ६५ रजत र १३० काश्य पदक गरि २६० पदकका लागि प्रतिस्पर्धा हुनेछ ।

च्याम्पियनसिपमा सिनियर पुरुष र महिला को ६/६ तौल समूह को प्रतिस्पर्धामा प्रथम हने खेलाडीहरुलाई पुनः छनोट गरी सर्वोत्कृष्ट हुने ३ जना पुरुष र २ जना महिला तेक्वान्दो खेलाडीलाई जनही नगद १ लाख पुरस्कार प्रदान गरिने छ। यी पाँच जना खेलाडी अमेरिकाको इस्टन मिसिगन युनिर्भसिटमा सन् २०२० को मे १ र २ मा हुने १३ औं अन्तर्राष्ट्रिय खुला मैत्री तेक्वान्दो प्रतियोगिताका लागि समेत
छनोट हुने छन् ।

तेस्रो राष्ट्रिय खुला मैत्री तेक्वान्दो च्याम्पियनसिपमा खुला रुपमा खेलाडीले सहभागीता जनाउन पाउनेछन् । यसअघि २०१७ को मार्च १६ र १७मा दोस्रो संस्करण खोटाङको एेंसेलुखर्कमा तथा पहिलो संस्करण २०१५ को नोभेम्बरमा ललितपुरको आर्मी हलमा भएको थियो।

कार्यक्रममा आईअोएफटिसिका निर्देशक दिवाकर महर्जनले विभिन्न संघ संस्थालाई ३ लाख ७५ हजार रुपैयाँ सहयोग प्रदान गरेका थिए ।