काठमाडौं (हाम्रो खेलकुद) – १३औं दक्षिण एसियाली खेलकुद (साग) अन्तर्गत तेक्वान्दोमा भारतको ‘इन्ट्री’ भएको छ । सागको औपचारिक उद्घाटन हुन ३ दिन मात्रै समय बाँकी रहँदा भारतले तेक्वान्दो, कराँते र आर्चरीमा सहभागिताको लागि पहल गरेपनि तेक्वान्दोमा मात्रै प्रवेश पाएको हो ।

नेपाल ओलम्पिक कमिटिका कार्यकारी सचिव सुजनलाल श्रेष्ठले आइसोसी र विश्व तेक्वान्दो महासंघको आग्रहमा भारतलाई तेक्वान्दोमा प्रवेश गराइएको हाम्रो खेलकुदलाई जानकारी गारए । भारतले तेक्वान्दोको सबै विधामा ३३ जना खेलाडी दर्ता गरेको छ ।

नोभेम्बर २० सम्ममा खेलाडी दर्ताका लागि अन्तिम मिति तय गरिएको थियो । भारतका सम्बद्ध संघहरु विवादमा रहेका कारण खेलाडी दर्ता हुन सकेको थिएन । दक्षिण एसियामा भारत तेक्वान्दो, कराते र आर्चरीमा बलियो प्रतिस्पर्धी राष्ट्र हो । सागमा आर्चरीमा १०, तेक्वान्दोमा २९ र करातेमा १९ स्वर्ण पदकका लागि प्रतिस्पर्धा हुनेछ । यी तीनै खेल नेपालले सर्वाधिक पदक आशा गरेको खेल हुन् ।

यससँगै भारतले सागमा २१ खेलमा सहभागिता जनाउने पक्का भएको छ । सागको औपचारिक उद्घाटन मंसिर १५ गते राष्ट्रपति विद्यादेवी भण्डारीले गर्नेछिन् । नेपालसहित ७ राष्ट्रका ३ हजार बढी खेलाडीले २६ खेलका लागि प्रतिस्पर्धा गर्नेछन् । सागमा समान ३ सय १७ स्वर्ण र रजत पदक तथा ४ सय ८१ कस्य पदकका लागि प्रतिस्पर्धा हुनेछ । नेपालले मात्र सबै २६ खेलमा भाग लिएको छ ।