काठमाडौं (हाम्रो खेलकुद) – १३ औं दक्षिण एसियाली खेलकुद प्रतियोगिता (साग) को आज चौंथो दिन बुधबार विभिन्न १६ खेलमा प्रतिस्पर्धा हुँदैछ ।

सागमा बुधबार एथ्लेटिक्स, ब्याडमिन्टन, क्रिकेट, साइक्लिङ, फुटबल, गल्फ, कराते, खो–खो, सुटिङ, टेबलटेनिस, तेक्वान्दो, ट्रायथलन, लन टेनिस, कब्बडी , ह्यान्डबल र उसुको प्रतिस्पर्धा हुनेछ । ब्याडमिन्टन, महिला क्रिकेट, ट्रायथलन र ह्यान्डबल पोखरामा हुन्छ ।
सागको तेस्रो दिनको खेल सकिदा नेपाल २३ स्वर्णसहित शीर्ष स्थानमा रहेको छ । भारत १७ स्वर्णसहित नेपाललाई पछ्याईरहेको छ ।

एथ्लेटिक्स

एथ्लेटिक्स अन्तरगत ट्याक एन्ड फिल्डमा बुधबार विभिन्न स्पर्धामा प्रतिस्पर्धा हुनेछ । त्रिपुरेश्वरस्थित दशरथ रंगशालामा बिहान ९ बजेबाट शुरु हुनेछ ।

फुटबल

साग पुरुष फुटबलमा नेपालले आज श्रीलंकासँग साँझ ५ बजेपछि त्रिपुरेश्वरस्थित दशरथ रंगशालामा प्रतिस्पर्धा गर्दैछ । मंगलबार नेपालले भुटानमाथि ४–० को सानदार जित निकालेको थियो ।

क्रिकेट
साग क्रिकेट अन्तर्गत महिलातर्फ बुधबार नेपालले टेष्ट राष्ट्र बंगलादेशसँग खेल्दै छ । पोखरा रंगशालामा हुने खेल बिहान १० बजे हुनेछ । महिलातर्फको अर्को खेलमा श्रीलंका र माल्दिभ्सबीच खेल हुनेछ । पुरुषतर्फ त्रिवि क्रिकेट मैदान कीर्तिपुरमा बंगलादेश यू–२३ र माल्दिभ्स तथा श्रीलंका यू–२३ टोली र भुटानबीच खेल हुनेछ ।

कराते

करातेको अन्तिम दिन बुधबार चार स्वर्णको छिनोफानो हुनेछ । सातदोबाटोस्थित कराते हलमा हुने करातेमा नेपालले व्यक्तिगत कुमुते र टिम कुमुते गरी १३ जना खेलाडीले प्रतिस्पर्धा गर्ने छन् । पुरुष कुमुतेतर्फ ५० केजीमा सोनाम लामा र महिलातर्फ ६८ केजीमा अनुपमा मगरले खेल्नेछिन् ।
यसैगरी महिला टिम कुमुतेतर्फ रिता कार्की, सनी तामाङ, एस्टर राई र अस्मिता वाईबाले खेल्नेछिन् । पुरुष टिम कुमुतेतर्फ बिनोद शाक्य, दिगम्बर पन्त, लेखनाथ मैनाली, सुशिल पौडेल, नबिन रसाईली, मुकुन्द महर्जन र अर्जुन बागचनले खेल्नेछन् ।

उसु
उसुमा बुधबार नेपालले दुई स्वर्णको लागि प्रतिस्पर्धा गर्दैछ । पुरुषतर्फ स्वर्ण पदकका लागि नेपालका थाउलोतर्फ दिपक हमाल र हरि प्रसाद गोले भिड्दैछन् । अन्य स्पर्धाको खेलहरु समेत हुनेछ ।

तेक्वान्दो

तेक्वान्दोमा बुधबार ६ स्वणको लागि खेल हुनेछ । सातदोबाटोस्थित तेक्वान्दो एकेडेमीमा गेरुगी पुरुषतर्फ ६३, ७४ र ८७ केजीमाथि प्रतिस्पर्धा हुनेछ । महिलामा ५३, ६२ र ७३ केजीमाथि स्पर्णको लागि प्रतिस्पर्धा हुनेछ ।
तेक्वान्दोमा नेपालले ९ स्वर्ण जितिसकेको छ ।

सुटिङ

सुटिङतर्फ बुधबार सातदोबाटोस्थित सुटिङ रेन्जमा विभिन्न स्पर्धामा खेलहरु हुँदैछ ।

खो–खो

खो–खोको महिलातर्फको उपाधिका लागि नेपालले भारतसँग प्रतिस्पर्धा गर्ने छ । पुरुषतर्फ बंगलादेश र भारतले प्रतिस्पर्धा गर्नेछ । नेपालले तेस्रो स्थानको लागि श्रीलंकासँग खेल्नेछ ।

ब्याडमिन्टन

पोखरामा हुने ब्याडमिन्टनतर्फ बुधबार एकल तथा टिम इभेन्टसको खेलहरु हुँदैछ । नेपालले सोमबार पुरुष र महिला टिमको दुवै स्पर्धामा कास्य जितेको थियो ।

गल्फ

गोकर्ण फरेस्ट गल्फ क्लबमा बिहान १० बजेबाट खेल सुरु हुनेछ । पुरुष ब्यक्तिगततर्फ नेपालका शुक्र बहादुर राईले अग्रता बनाएका छन् । पुरुष टिममा पनि नेपालले अग्रता बनाएको छ । गल्फको एकलतर्फ नेपालसहित बंगलादेश, श्रीलंका र भुटानले प्रतिस्पर्धा गर्दैछन् । महिलामा नेपाल, बंगलादेश र श्रीलंकागरी तीनदेशको मात्र सहभागिता रहेको छ ।

टेबल टेनिस

टेबल टेनिसमा बुधबार विभिन्न इभेन्टसमा प्रतिस्पर्धा हुनेछ । लैनचौरस्थित राष्ट्रिय टेबलटेनिस प्रशिक्षण केन्द्रमा बुधबार पुरुष डबल्स र महिला डबल्स फाइनल, मिक्स डबल्सका फाइनलका खेलहरु सञ्चालन हुनेछन् । यस्तै पुरुष र महिाला एकलका खेलहरु पनि सञ्चालन हुनेछ । मंगलबार नेपालले पुरुष टिममा रजत र महिला टिममा कास्य जितेको छ ।

टेनिस

सातदोबाटोस्थित टेनिस कोर्टमा बुधबार टिम इभेन्टसका खेलहरु सञ्चालन हुनेछन् ।

ट्रायथलन

पोखरामा आयोजना हुने ट्रायथलन अन्तर्गत बुधबार १ स्वर्णको लागि खेल हुनेछ । मिक्स टिम रिलेतर्फ नेपाल, भारत र श्रीलंकाका खेलाडीहरुले प्रतिस्पर्धा गर्नेछन् । मिक्स टिम रिलेमा प्रत्येक देशका २ पुरुष र २ महिलासहितको एक÷एक टिम रहनेछ । रिलेमा ३ सय मिटर पौडी, ६ किलोमिटर साईकिलिङ र २.५ किलोमिटर दौडको दुरी तय गरिएको छ ।

ह्यान्डबल

पोखरामा बुधबारदेखि ह्यान्डबल सुरु हुनेछ । पहिलो दिन चार खेल हुनेछ । महिलातर्फ नेपालले श्रीलंकासँग खेल्दा भारतले माल्दिभ्सको सामना गर्नेछ । पुरुषतर्फ नेपाल र श्रीलंका तथा भारत र बंगलादेशबीच खेल हुनेछ ।

साइक्लिङ
साइक्लिङतर्फ बुधबार विभिन्न स्पर्धाको सुरु हुनेछ । साइक्लिङको प्रतिस्पर्धा सहिद पार्क गोकर्णमा हुनेछ ।

कबड्डी

कबड्डीको खेल बुधबारबाट सुरु हुनेछ । कबड्डी एपीएफ मैदान हल्चोकमा खेल्नेछ ।