काठमाडौं (हाम्रो खेकलुद) – १३ औं दक्षिण एसियाली खेलकुद (साग) पुरुष टि ट्वान्टी क्रिकेटमा भुटान श्रीलंका यू२३ सँग लज्जास्पद हार बेहोरेको छ । बुधवार टियु क्रिकेट मैदानमा सम्पन्न खेलमा भुटान श्रीलंकासँग १ सय ७३ रनको फराकिलो अन्तरले पराजित भएको हो ।

२ सय ४९ रनको विशाल विजयी लक्ष्य पछ्याएको भुटान १८.४ ओभरमा ७५ रनमा अल आउट भयो । रन्जुङ मिक्यो दोर्जेले २२ र सोनमले १० रन जोड्न बाहेक अन्यले राम्रो प्रर्दशन गर्न सकेनन् । बंगलादेशको कसिलो बलिङ सामु भुटानका ९ ब्याट्सम्यानले दोहोरो अंकमा रन छुन सकेनन् । श्रीलंकाका शाम्मु आशन र जेहान डानियलले २–२ विकेट लिए ।

त्यसअघि टस हारेर ब्याटिङ थालेको श्रीलंकाले निर्धारित २० ओभरमा ४ विकेट गुमाउँदै २ सय ४८ रन बनाएको थियो । श्रीलंकाका ओपनर पाथुम निसानकाले ४८ बलमा ८ चौका र २ छक्का सहित ७६ रन जोड्दै राम्रो सुरुवात दिएका थिए । कप्तान चारिथ आसलंका २५ रनमा आउट हुँदा विकेटकीपर निसान मदुस्का फ्रर्नान्डोले ६५ रन जोडे ।

कामिन्दु मेन्डिसले २७, शाम्मु असान र आसेन बन्दरा समान १४ रनमा अविजित रहे । भुटानका कर्मा दोर्जे, तेन्जिन जेएनआर, टोबडेन सिङ्या र थिन्ली जम्तसोले १–१ विकेट लिए । श्रीलंकाले पहिलो खेलमा नेपाललाई ६ विकेटले हराएको थियो । विहीवार श्रीलंकाले माल्दिभ्स तथा भुटानले नेपालसँग खेल्ने छन् ।