काठमाडौं (हाम्रो खेलकुद) – विश्व गल्फ टिचर महासंघ (डब्लुजीटिएफ) ले नेपालका व्यावसायिक गल्फर सचिन भट्टराईलाई सन् २०२०-२१ को शीर्ष १ सय गल्फ प्रशिक्षक सुचिमा सामेल गरेको छ ।
संयुक्त राज्य अमेरिकाको गल्फ टिचिङ फेडेरेसनबाट मास्टर सर्टिफिकेट हासिल गरेका भट्टराई लामो समयदेखि रियल नेपाल गल्फ क्लबमा जुनियर क्याम्प संचालन गर्दै आइरहेका छन् । भट्टराईकै प्रशिक्षणमा प्रतिमा शेर्पाले आफ्नो करिअरलाई अघि बढाएर विश्वभर चर्चा बटुलेकी थिइन् । शेर्पा हाल अमेरिकामा अध्ययनरत छिन् ।
भट्टराईले यस उपलब्धिले आफूलाई झनै प्रोत्साहन दिएको बताएका छन् । ‘यो मेरो लागि गर्वको विषय हो । अझ विशेष मैले मन पराएका प्रशिक्षक ग्रान्ट ग्यारिसन पनि यसै सुचिमा छन्,’ भट्टराईले भने ।
‘मैले पछिल्लो एक दशक गरेको कडा मिहिनेतको प्रतिफलको रुपमा मैले यसलाई लिएको छु । आउने दिनमा पनि म यसमा लागेर नेपाली गल्फलाई योगदान दिनेछु,’ उनले थपे ।
प्रशिक्षण सँगसँगै गल्फर भट्टराई नियमित रुपमा व्यावसायिक टुर पनि खेल्दै आएका छन् ।
