काठमाडौं (हाम्रो खेलकुद) – एमेच्योर गल्फर सुमन जोशीले नेपालको गल्फ इतिहासमा नै पहिलोपटक होल इन वनमा राखिएको कार उपाधि जितेका छन् ।

शनिबार गोकर्ण गल्फ कोर्षमा स्वर्गीय आङ्ग छिरिङ शेर्पाको स्मृतिमा आयोजित गल्फ प्रतियोगिताको होल नम्बर १० मा सुमनले होल इन वन गर्दै कार जित्न सफल भएका हुन् । उनले १ सय ६५ यार्ड टाढा रहेको होलमा होल इन वनको सफलता प्राप्त गरे । सुमनले पुरस्कार स्वरुप कियाको सोनेट कार जितेका छन् । सो पुरस्कारको प्रायोजन कन्टिनेन्टल ट्रेडिङ इन्टरप्राइजेज प्रा.लि.ले गरेको छ ।

यसअघि विभिन्न प्रतियोगिताहरुमा होल इन वन गर्नेले कार उपाधि पाउने भनेपनि कसैले जित्न सकेका थिएनन् । यद्यपि अन्य प्रतियोगितामा पनि होल इन वन भएका थिए । तर कार पुरस्कार नै राखिएको प्रतियोगितामा होल इन वन गरेर उपाधि जित्ने सुमन पहिलो गल्फर बनेका छन् ।

प्रतियोगिताको समग्र उपाधि भने सुनिल कार्कीले जिते । विभिन्न १० विधामा खेलाइएको उक्त प्रतियोगिता ४१ अंकका साथ कार्कीले उपाधि जिते । उपविजेता ४० अंकका साथ ताहिर शाह भए ।

त्यसैगरी हृदेश कुमार सिंहले प्रतियोगितामा ३४ ग्रस अंक बटुल्दै बेस्ट ग्रसको उपाधि जिते । बेस्ट ग्रस रनरअपको उपाधि विजय श्रेष्ठ आईनहाउसले प्राप्त गरे । स्वर्गीय आङ्ग छिरिङ शेर्पाको फेवरेट होल (होल नम्बर १३) मा बाबु शेर्पाले होलको सबभन्दा नजिक प्रहार गरेर क्लोजेस्ट टु द पिन विजेता बने ।

महिलातर्फको उपाधि ३८ अंकका साथमा कश्मिरा शाहले जितेकी छिन् । महिलातर्फ रनरअपको विजेता गिता गुरुङ्ग बनिन् । सिनियरतर्फको विजेता प्रदिप कुमार श्रेष्ठ बने । जुनियरतर्फ ४४ अंकका साथ शयान बस्नेत बिजेता बने । तासी छिरिङ डोङ लङ्गेस्ट ड्राइभ विधाको बिजेता बने । दावा जे शेर्पाले प्रतियोगिताको मोस्ट बर्डीज उपाधि जिते । क्लोटेस्ट टु द पिन तर्फको उपाधि सुरेन्द्र फुँयालले जिते । सबै विजेताले यति एअरलाइन्सको तर्फबाट हवाई टिकट सहित विभिन्न टुर प्याकेज प्राप्त गरेका छन् ।

आङ्ग छिरिङ शेर्पाको दोस्रो वार्षिक स्मृतिमा यती एअरलाइन्स, तारा एअर र गोकर्ण फरेस्ट रिसोर्टले संयुक्त रुपमा गल्फ प्रतियोगिताको आयोजना गरेको थियो । दुईदिन सम्म चलेको उक्त प्रतियोगिताल १६० जनाले सहभागीता जनाएका थिए । प्रतियोगीतामा सहभागी खेलाडीबाट उठाईएको ३ लाख बिस हजार रकम शान्ति सेवा गृह, तिलगंगा र वल्र्ड भिजन ईन्टरनेशनल इन नेपाल लाई दामासाही रुपमा प्रदान गरिएको थियो ।