एजेन्सी – मध्यक्रमका ब्याट्सम्यान सूर्यकुमार यादवको अर्धशतकको सहयोगमा भारतले पहिलो टि२० आई खेलमा श्रीलंकालाई १ सय ६५ रनको मध्यम लक्ष्य दिएको छ ।

आर प्रेमाडासा स्टेडियम कोलोम्बोमा टस हारेर ब्याटिङको निम्तो पाएको भारतले निर्धारित २० ओभरमा ५ विकेट गुमाउँदै १ सय ६४ रन बनायो । इन्डियन प्रिमियर लिग (आइपिएल) स्टार ब्याट्सम्यानको बाहुल्यता भएको भारत श्रीलंकाको अनुसाशित बलिङ सामू मध्यम योगफलमा रोकिएको छ । अन्तिम पाँच ओभरमा श्रीलंकाले मात्र ४३ रन खर्चिदै उत्कृष्ट बलिङ गरेको थियो । भारतका सूर्यकुमार यादवले ३४ बलमा ५ चौका र २ छक्का सहित सर्वाधिक ५० रनको योगदान दिए ।

ओपनर पृथ्वी शा टि२० आई डेब्यूको पहिलो खेलमा पहिलो बलमै शून्यमा क्याच आउट हुन पुगे । पृथ्वी तीव्र गतिका बलर दुश्मन्था चामिरा बलमा एज लागेर आउट भएका थिए । दोस्रो विकेटका लागि कप्तान शिखर धवन र सन्जु स्यामसनले ३६ बलमा ५१ रनको साझेदारी गर्दै इनिङ अघि बढाएका थिए । स्यामसनलाई स्पिनर वानिन्दु हसरंगाले २७ रनमा एलबिडब्लू आउट गरे । स्यामसनले २० बलमा २ चौका र १ छक्का प्रहार गरेका थिए ।

तेस्रो विकेटका लागि शिखरले सूर्यसँग ४८ बलमा ६२ रनको साझेदारी गरेका थिए । शिखरलाई १५ औं ओभरको पहिलो बलमा चामिका करुणारत्नले एशेन बन्डाराबाट ४६ रनमा क्याच आउट गराउँदै साझेदारी तोडेका थिए । शिखरले ३६ बलमा ४ चौका र १ छक्का प्रहार गरे । एक ओभरपछि वानिन्दुको बलमा सूर्य क्याच आउट भएका थिए । भारतका फिनिसर हार्दिक पान्ड्या १२ बल खेलि १० रन बनाए । ईशान किशन १४ बलमा १ चौका र १ छक्का सहित २० रनमा अविजित रहे । क्रुनाल पान्ड्या ३ बलमा ३ रनमा अविजित रहे ।

श्रीलंका स्पिनर वानिन्दु हसरंगाले ४ ओभरमा २८ रन खर्चेर २ विकेट लिए । दुश्मन्था चामिराले ४ ओभरमा २४ रन खर्चेर २ विकेट लिए । चामिका करुणारत्नेको नाममा एक विकेट रह्यो ।