एजेन्सी – १३ औं दक्षिण एसियाली खेलकुदमा दोहोरो स्वर्ण विजेता आयशा शाक्यले एसिया पुम्से ओपन च्याम्पियनसिप २०२१ मा कास्य पदक जितेकी छिन् । भर्चुअल माध्यमबाट विश्व तेक्वान्दो एसियाले आयोजना गरेको प्रतियोगितामा आयशाले ब्ल्याक बेल्ट ४० वर्षमुनि उमेर समूहमा कास्य पदक जितेकी हुन् ।

फाइल तस्बिर

फाइनलमा मेक्सिकोकी एस्पिनोजा मार्केजले ७.८१ अंकसहित स्वर्ण जित्दा हङकङकी चेङले ७.३९ अंक जोड्दै रजत पदक हासिल गरिन् । चाइनिज ताइपेइकी चेन (७.३४) र नेपालकी आयशा (७.१९) ले कास्य पदक हासिल गरेका हुन् । अन्तिम चरणमा ८ खेलाडीले प्रतिस्पर्धा गरेका थिए ।

यसअघि पहिलो चरणमा १३ जनाले प्रतिस्पर्धा गरेको यस इभेन्टमा आयशा ६.७५ को स्कोर जोड्दै अन्तिम चरणमा प्रवेश गरेकी थिइन् । फाइनलमा आफ्नो प्रदर्शन सुधार्दै उनी कास्य जित्न सफल भएकी हुन् ।

नेपालबाट यसै प्रतियोगिताको पुरुष ब्ल्याक बेल्ट अन्डर ३० मा शिशिर श्रेष्ठ र कृष्णबहादुर तामाङ तथा ब्ल्याक बेल्ट अन्डर ४० स्पर्धामा रेजिन रिमालले खेलेका थिए । रेजिन र कृष्ण दोस्रो चरणमा प्रवेश गरेपनि पदक जित्न सकेनन् । उनीहरु सेमिफाइनल चरणमा बाहिरिएका थिए ।

महिला ब्ल्याक बेल्ट अन्डर ३० मा सागकै स्वर्णधारी संजिला तिमल्सिना, प्रशंसा क्षेत्री र निता गुरुङ पहिलो चरणबाट बाहिरिइन् । सिना मादेन सोहि स्पर्धाको अर्को चरणमा पुगेपनि पदक जित्न सकिनन् । उनी पनि सेमिफाइनलमा नै रोकिएकी थिइन् ।

पुरुष अन्डर ३० कलर बेल्टतर्फ स्यामुएल तामाङ, आश्विन राई, उज्ज्वल घले, इश्वर सेढाइले पहिलो चरण पार गरे । दीपेन्द्र गुरुङ भने पहिलो चरणमा नै अयोग्य भएका थिए ।