एजेन्सी – क्याटलान क्लब बार्सिलोनाले युरोपा लिगको नकआउट चरणको प्ले अफमा इटालियन क्लब नेपोली प्रतिद्धन्द्धी पाएको छ ।स्वीट्जरल्यान्डको नियोनमा सोमबार राति निकालिएको ‘ड्र’ मा बार्सिलोनाले बलियो प्रतिद्धन्द्धीको रुपमा नेपोली पाएको हो ।

बार्सिलोना च्याम्पियन्स लिगमा समुहमा तेस्रो हुदै समूह चरणबाट बाहिरिएको थियो । नेपोली भने युरोपा लिगमा आफ्नो समूहमा दोस्रो भएको थियो । नकआउट चरणको प्ले अफमा स्पेनका चार टोलीले प्रतिस्पर्धा गर्दैछन् । बार्सिलोना र सेभिया च्याम्पियन्स लिगबाट तथा रियल सोसिडाड र रियल बेटिस युरोपा लिगमा दोस्रो भएको टोली हो ।

यस्तै जर्मन क्लब बोरुसिया डर्टमुन्डले स्कटिस क्लब रेन्जर्ससँग प्रतिस्पर्धा गर्नेछ । युइएफएले युरोपा लिगको समूह चरणमा दोस्रो भएको टोली र च्याम्पियन्स लिगको समूह चरणबाट बाहिरिएको टोलीको सोमबार ‘ड्र’ निकालेको हो । युरोपा लिगको समूह विजेताले भने अन्तिम १६ मा स्थान पक्का गरिसकेको छ ।

प्ले अफको खेलहरु दुई लेगमा हुनेछ । प्ले अफ राउन्डको विजेता टोलीले प्रि–क्वाटरफाइनलमा स्थान पक्का गर्नेछ । ति आठ टोली युरोपा लिगको समूह विजेतासँग जोडिनेछ । त्यसपछि नयाँ ‘ड्र’ निकालिनेछ । न्कआउट चरणको प्ले अफको पहिलो लेग १७ र दोस्रो लेग २४ फेब्रुअरीमा हुनेछ । प्रि–क्वाटरफाइनलको पहिलो लेग १० र दोस्रो लेग १७ मार्चमा हुनेछ ।

सर्वियन क्लब क्रेभेना जेभेज्दा, जर्मन क्लब आइनट्राख्ट फ्रान्कफुर्ट, टर्किस क्लब गालाटासारे, जर्मन क्लब बायर लिभरकुसन, फ्रान्सेली क्लब मोनाको, रसियन क्लब स्पारटाक मस्को र इंग्लिस क्लब वेस्ट ह्यामले समूह विजेताको रुपमा प्रि–क्वाटरफाइनलमा स्थान पक्का गरिसकेका छन् ।

न्कआउट चरण प्ले अफ ‘ड्र’

सेभियाविरुद्ध डेनामो

एटलान्टाविरुद्ध ओलम्पियाकोस

आरबी लाइप्जिगविरुद्ध रियल सोसिडाड

बार्सिलोनाविरुद्ध नेपोली

जेनिथविरुद्ध रियल बेटिस

बोरुसिया डर्टमुन्डविरुद्ध रेन्जर्स

सेरिफविरुद्ध ब्रागा

पोर्टाेविरुद्ध लाजियो