एजेन्सी – रेलिगेसन जोनमा संघर्ष गरिरहेको घरेलु टोली सालेरनिटानामाथि सानदार जित निकाल्दै इन्टर मिलानले इटालियन सिरी ‘ए’ शीर्षस्थानमा ४ अंकको अग्रता बनाएको छ ।

स्टेडियो एरेची सालेर्नाेमा शुक्रबार राति भएको खेलमा इन्टर मिलानले घरेलु टोलीलाई ५–० को फराकिलो गोल अन्तरले पराजित गरेको हो ।इन्टरको सानदार जितमा इभान पेरिसिस, डेम्जेल डेमफ्रेज, एलेक्सिस सान्चेज, लोउटारो मार्टिनेज र रोबर्टाे गाग्लिएरडिनीले समान एक गोल गरे । पहिलो हाफमा तीन तथा दोस्रो हाफमा तीन गोल निस्किएको थियो ।

गोलको वर्षा भएको खेलमा इन्टर मिलानले खेलको ११औं मिनेटमा इभान पेरिसिसको गोलबाट अग्रता लिएको थियो । उनले हकान कलहानोग्लुको पासमा गोल गरेका थिए । ३३औं मिनेटमा इडेन जेकोको पासमा डेन्जेल डमफ्रेजले गोल गर्दै इन्टरको अग्रता दोब्बर पारे ।

५२औं मिनेटमा एलेक्सिस सान्चेजले गोल गर्दै इन्टरलाई खेलमा ३–० ले अघि बढाए । उनले हकानको पासलाई सदुपयोग गरेका थिए । ७७औं मिनेटमा सब्सिच्युट फरवाड लोउटारो मार्टिनेजले गोल गर्दै इन्टरलाई फराकिलो जिततर्फ अग्रसर गराए ।

५६औं मिनेटमा एलेक्सिस सान्चेजको स्थानमा मैदान छिरेका मार्टिनेजले गोल गर्न सफल भएका थिए । ८७औं मिनेटमा अर्का सब्सिच्युट मिडफिल्डर रोबर्टाे गाग्लिएरडिनीले गोल गर्दै इन्टरको जित पक्का गरे । रोबर्टाे गाग्लिएरडिनी ७१औं मिनेटमा मार्सेलो ब्रोजोभिकको स्थानमा मैदान छिरेका थिए ।

जितसँगै इन्टरले दोस्रो स्थानमा रहेको एसी मिलानलाई ४ अंकले पछि पारेको छ । यद्दपि मिलानले एक खेल कम खेलेको छ । इन्टरको १८ खेलबाट ४३ अंक पुगेको छ । मिलानको १७ खेलबाट ३९ अंक छ । पराजित सालरेनिटाना ८ अंक जोडेर पुछारमा रहेको छ ।