काठमाडौं(हाम्रो खेलकुद) – अमिशा कार्की र चन्द्रा भन्डारीले ह्याट्रिक गरेको एन्फा महिला लिगको खेलमा त्रिभुवन आर्मी क्लबले चन्द्रपुर नगरपालिकामाथि फराकिलो जित हात पारेको छ ।

सातौं खेलमा पाँचौ जित निकाल्ने क्रममा शुक्रवार आर्मीले चन्द्रपुरलाई १०-० ले पराजित गर्यो ।
एन्फा कम्प्लेक्स सातदोबाटोमा भएको खेलमा आर्मीकस अमिशा र चन्द्रासँगै हिमा चौधरी, दिपा शाही, शर्मिला मगर र अन्जना राना मगरले समान १ गोल गरिन् ।

पहिलो मिनेटमा गोल गर्दै चन्द्राले आर्मीका लागि अग्रता दिलाएकी थिइन् । २७औं मिनेटमा अमिशाले गोल गर्दै आर्मीको अग्रता दोब्बरको बनाइन् ।

३२औं मिनेटमा हिमाले गोल गर्दै खेल ३-० मा पुर्याइन् । ४०औं मिनेटमा चन्द्राले व्यक्तिगत दोस्रो गोल गरिन् । ४२औं मिनेटमा अमिशाले व्यक्तिगत दोस्रो गोल गरिन् । दिपाले ५२औं मिनेटमा पेनाल्टीमार्फत गोल गर्दै खेल ६-० मा पुर्याइन् ।

६७औं मिनेटमा अन्जनाले गोल गरिन् । अमिशाले ६८औं मिनेटमा गोल गर्दै ह्याट्रिक पूरा गरिन् । चन्द्राले ८४औ मिनेटमा ह्याट्रिक पूरा गर्दा ८५औं मिनेटमा शर्मिलाले गोल थपिन् ।

जित पछि आर्मी ७ खेलबाट १६ अंकका साथ दोस्रो स्थानमा कायमै रहेको छ । पराजित चन्द्रपुर ७ अंकका साथ छैटौं स्थानमा छ ।

आजै भएको पहिलो खेलमा रश्मि कुमारी घिसिङले ५ गोलमा विभागीय टोली एपिएफ क्लब अपराजित रहदै शीर्ष स्थानमा कायमै छ ।

एन्फा कम्प्लेक्स सातदोबाटोमा भएको खेलमा एपिएफले कोशी प्रदेशमाथि ८-० को फराकिलो जित निकाल्यो ।

एपिएफको जितमा रश्मिका अलवा अनिता बस्नेतले २ तथा अनिता केसीले १ गोल गरिन् । एपिएफका लागि पाँचौं मिनेटमा अनिता केसीले गोल गर्दै अग्रता दिलाइन् ।

अनिता बस्नेतले १९ औं र ८०औं मिनेटमा गोल गरिन् । रश्मिले ५६औं, ८१औं, ८५औं मिनेटमा गोल गर्दै ह्याट्रिक पूरा गरिन्। उनले ८७औं र ८८औं मिनेटमा गोल थप्दै एपिएफलाई सहज जित दिलाइन् । ७ खेलमा एपिएफको १९ अंक पुगेको छ।

अखिल नेपाल फुटबल संघ(एन्फा) को आयोजनामा जारी लिगमा १० टोलीको सहभागिता रहेको छ । सहभागी टोलीले पहिलो चरणमा एक अर्का विरुद्ध खेल्नेछन् ।