सुशील पन्त क्षेत्री,चितवन

प्रतिस्पर्धात्मक खेलमा राइजिङ स्टार भुमहीलाई पराजित गर्दै आयोजक हानामी भरतपुर फुटबल क्लब (बिएफसी) गोल्डेन इमिनेन्ट दोस्रो चितवन गोल्डकपको क्वाटरफाइनलमा प्रवेश गरेको छ ।

नेपाल प्रहरी शिक्षालयको मैदानमा आज भएको खेलमा बिएफसीले राइजिङलाई ३-२ ले हरायो । बिएफसीको जितमा राज भुसालले २ तथा सन्जीब बिष्टले १ गोल गरे । राङजिङ स्टारका फागुराम थारु र कप्तान विनोद केवतले समान १ गोल गरे।

खेलमा सुरुवाती १२ मिनेट भित्रै ३ गोल भएको थियो । तेस्रो मिनेटमा राजले गोल गर्दै बिएफसीलाई अग्रता दिलाए । नवौं मिनेटमा सन्जीबले बिएफसीको अग्रता दोब्बर बनाए ।

सुरुवातमाै २ गोलले पछि परेपछि राइजिङ स्टार दबाबमा परेको थियो । १२ औं मिनेटमा फागुरामले फ्रिकिकमा गोल गर्दै राइजिङ स्टारलाई खेलमा फर्काउने संकेत गरे ।

५६ औं मिनेटमा राजले व्यक्तिगत दोस्रो गोल गरेपछि बिएफसीले ३-१ को अग्रता लियो । ६३ औं मिनेटमा राइजिङ स्टारका कप्तान विनोदले गोल गरे पनि हार टार्न सकेनन् । बिएफसीको राज प्लेयर अफ दि म्याच भए । बिएफसीले अब सेमिफाइनल प्रवेशका लागि नेपाल पुलिससँग खेल्नेछ ।

प्रतियोगितामा शनिवार बुटवल लुम्बिनी एफसी र न्यु स्टार सुनसरी भिड्नेछन् । खेल दिउँसो ४ बजे सुरु हुनेछ । असोज १२ गतेसम्म चल्ने प्रतियोगिताको विजेताले ६ लाख रुपैयाँ र दोस्रो टोलीले ३ लाख रुपैयाँ प्राप्त गर्नेछ ।