एजेन्सी – अल्भारो मोराटाले एक गोल र अर्काे गोलको लागि असिस्ट दिएपछि युभेन्ट्सले इटालियन सिरी ‘ए’ मा बोलोग्नालाई पराजित गरेको छ ।

युभेन्ट्सले बोलोग्नालाई उसकै मैदानमा २–० ले पराजित गरेको हो । एक गोल जुआन कोर्डाडोको नाममा रह्यो । खेलको छैटौं मिनेटमा अल्भारो मोराटाको गोलबाट युभेन्ट्सले अग्रता लिएको थियो । उनले फेडरिको बर्नरडेस्चीको पासमा गोल गरेका थिए ।

६९औं मिनेटमा कोर्डाडोले मोराटाको पासमा गोल गर्दै युभेन्ट्सको जित सुनिश्चित गरे । यो जितसँगै युभेन्ट्स १८ खेलबाट ३१ अंक जोडेर छैटौं स्थानमा उक्लिएको छ । पराजित बोलोग्ना २४ अंक जोडेर १०औं स्थानमा रहेको छ ।

सिरी ‘ए’ कै अर्काे खेलमा रोमाले एटलान्टालाई उसकै मैदानमा ४–१ ले पराजित गरेको छ । रोमाको जितमा ट्याम्मी अब्राहमले दुई तथा निकोलो जानिलो र क्रिस स्मलिङले समान एक गोल गरे । एटलान्टाले एक गोल उपहार पाएको थियो । ब्रायन क्रिस्टान्टेले आत्मघाती गोल गरेका थिए ।

यस्तै उडिनेसले १० खेलाडीमा समेटिएको क्याग्लिएरीलाई ४–० ले पराजित गरेको छ । उडिनेसको जितमा जेरार्ड डिउलोफिउले दुई तथा जिन भिक्टर माकेंगो र नाहुएल मोलिनाले समान एक गोल गरे । ६६औं मिनेटमा राजभान मारिन दोहोरो पहेलो कार्ड खाँदै मैदानबाट बाहिरिएपछि क्याग्लिएरी १० खेलाडीमा समेटिन पुग्यो ।