एजेन्सी – अर्जेन्टिनी फरवार्ड लियोनेल मेस्सीलाई उछिन्दै स्पेनिस युवा मिडफिल्डर पाब्लो गाभिरा (गाभी) क्याटलान क्लब बार्सिलोनाका लागि गोल गर्ने तेस्रो युवा खेलाडी बनेका छन् ।

शनिबार राति भएको खेलमा इल्चेलाई ३–२ ले पराजित गरेको खेलमा गाभीले बार्सिलोनाको सिनियर टोलीबाट एक गोल गर्दै मेस्सीलाई पछि पारेका हुन् ।

उनकै उच्च प्रदर्शनमा बार्सिलोनाले पछिल्लो पाँच खेल खेल्दा जित निकाल्न सफल भएको थियो । २८ नोभेम्वरमा भिल्लारियललाई ३–१ ले पराजित गरेयता बार्सिलोनाले चार खेलमा जित निकाल्न सकेको थिएन । त्यसक्रमा बार्सिलोनाले समान दुई बराबरी र दुई हारको नतिजा निकालेको थियो ।

बार्सिलोनाले मेस्सीले १७ वर्ष ३३१ दिनमा बार्सिलोनाको सिनियर टोलीमा गोल गरेका थिए । गाभीले १७ वर्ष १३५ दिनमा गोल गर्दै मेस्सीलाई पछि पारेका हुन् । अन्सु फातीले १६ वर्ष ३०४ दिन र बोजानले १७ वर्ष ५३ दिनमा बार्सिलोनाका लागि गोल गर्ने युवा खेलाडीको सुचीमा पहिलो र दोस्रो स्थानमा रहेका छन् ।

यो सिजन देखि नै पहिलो रोजाईमा खेल्ने मौका पाएको गाभीले ला लिगामा १५ खेल खेल्दा १ गोल र ३ असिस्ट दिएका छन् । इल्चेविरुद्धको खेलमा पनि गाभीले एक गोलसँगै एक असिस्ट दिएका थिए । स्पेनको सिनियर टोलीबाट चार खेलमा प्रतिनिधित्व गरिसकेका गाभीले बार्सिलोनाका लागि २१ ख्ेल खेलिसकेका छन् ।

बार्सिलोनाकै एकेडेमी ला मासियामा हुर्किएका गाभीलाई बार्सिलोना र स्पेनको महत्वपुर्ण खेलाडीको रुपमा हेरिएको छ ।