लमजुङ (हाम्रो खेलकुद) – साविक विजेता श्री भगवती युवा क्लब टोखा र बुद्ध युथ क्लब (बिवाइसी लमजुङमा जारी जिल्लाकै सर्वाधिक धनराशिको २९औं संस्करणको त्रिवेणी कप राष्ट्रव्यापी फुटवल प्रतियोगिताको सेमिफाइनलमा प्रवेश गरेका छन् ।

बेंसीशहरस्थित सहजी खेल मैदानमा आइतबार भएको क्वाटरफाइनलमा श्री भगवतीले एमसिटीलाई ४–१ को फराकिलो गोल अन्तरले पराजित गर्दै अन्तिम चारमा स्थान पक्का गरेको हो ।

श्री भगवतीको जितमा अर्मान्डले दुई तथा अनिष श्रेष्ठ र जिनाहुआ मोइसले समान एक गोल गरे । एमसिटीका सुमिन थापाले एक गोल फर्काए । खेलको २७औं मिनेटमा अर्मान्डले गोल गर्दै श्री भगवतीलाई १–० को अग्रता दिलाए । ३२औं मिनेटमा अनिषले गोल गर्दै श्री भगवतीको अग्रता दोब्बर पारे ।

४६औं मिनेटमा अर्मान्डले व्यक्तिगत दोस्रो तथा टोलीका लागि तेस्रो गोल गरेपछि श्री भगवती सहज जिततर्फ अग्रसर बन्यो । ५४औं मिनेटमा सुमिनले गोल गर्दै खेललाई ३–१ को अवस्थामा ल्याए । ८१औं मिनेटमा जिनाहुआले गोल गर्दै श्री भगवतीको जित पक्का गरे । श्री भगवतीका अनिष श्रेष्ठ म्यान अफ दि म्याच घोषित भए ।

अर्काे खेलमा बुद्ध युथ क्लब (बिवाइसी) ले लालीगुराँस युथ क्लबलाई ३–० ले पराजित गर्दै सेमिफाइनलमा पुग्न सफल भएको छ । बिवाइसीको जितमा फल्कुनी एवायोनी, सोमिडे र सचिन थापा मगरले गोल गरे ।

खेलको २७औं मिनेटमा एवायोनीले गोल गर्दै सुरुवाती अग्रता दिलाए । ५९औं मिनेटमा सोमिडेले गोल गर्दै टोलीको अग्रता दोब्बर पारे । ८३औ मिनेटमा सचिनले गोल गर्दै जित पक्का गरे । बिवाइसीका फल्कुनी म्यान अफ दि म्याच घोषित भए ।

सोमबार क्वाटरफाइनल आयोजक त्रिवेणी युवा क्लब र रोड्स रामपुर तथा कालिका एफसी चितवन र समाज कल्याण काठमाडौंबीच प्रतिस्पर्धा हुने आयोजकले जनाएको छ ।

प्रतियोगितामा लमजुङ, काठमाडौ, पोखरा, चितवन, तनहुँलगायत जिल्लाबाट गरी १८ टिमको सहभागिता रहेको छ । यसपालीको त्रिवेणी कपको विजेताले ५ लाख, त्रिवेणी कप र स्वर्ण पदक प्राप्त गर्नेछ ।

उपविजेताले ३ लाख र रजत पदक पाउनेछ । सेमिफाइनल पराजित हुने दुई टोलीले समान ५०–५० रुपैया प्रदान गरिने आयोजकले जनाएको छ । सर्वाधिक गोलकर्ता र सर्वोत्कृष्ट खेलाडीले जनही १५–१५ हजार रुपैयाँ प्रदान गरिनेछ । त्रिवेणी कप २० पुससम्म सञ्चालन हुनेछ ।